Shillong, Naitung 16
Ka ïingbishar Meghalaya High Court, ka la pynkylla ïa ka hukum ba ha shwa da kaba ai por sa shiteng kynta ka por ïa ki nongshong dei madan ba kin buh ïa ki dukan bad ban lum noh ïa ki hapoh ka por ba la buh ha ka thaiñ Khyndailad.
Kane ka rai jong ka ïingbishar ka la mih haba jubab ïa ka aplikeshon ba la mudui da ka Meghalaya and Greater Shillong Progressive Hawkers and Street Vendors Association.
Ka ïingbishar ka la pynjlan ïa ka por shong dukan madan, da kaba ailad ïa ki briew ba kin buh ïa ki dukan naduh ka por 12 baje mynsngi haduh 2:15 janmiet bad naduh ka por 7 baje janmiet haduh 9:15 mynmiet.
Hadien ba la shong bishar ïa ka PIL ha ka Sngi Balang, ka Division Bench ba kynthup ïa u Chief Justice IP Mukerji bad Justice W Diengdoh ka la ong, “Haba shimkhia ïa kine ki jingïasaid ba mar pyrshah, ngi pynkylla noh ïa ka hukum jong ngi, kaba 3 tarik u Naitung 2025, da kaba ai kham bun ka por kata da shiteng kynta bad khatsan minit ha ka por shong dukan madan janmiet ba kin buh ïa ki dukan bad ba kin lum pat ïa ki bad kane ka jingaipor kan treikam ruh ha ki kynta shong dukan mynmiet.”
“Ha kawei pat ka kyntien, ki nongshong dukan madan kin ïohlad ban sdang pynïeng ïa la ki dukan naduh 12 baje mynsngi bad sdang lum pat naduh ka 2 baje janmiet haduh 2:15 janmiet, bad sa sdang buh biang ïa ki dukan ha ka por 7 baje mynmiet bad lum pat hapoh ka por 9:15 mynmiet,” ka la bynrap.
Ka ïingbishar ka la bthah ba ïa kine ki kynta thymmai ban shong dukan madan dei ban pyntreikam hapoh ka jingpynïaid kaba pyrkhing jong ki bor Sorkar bad u Special Officer.
Nalor kane, ka tnat pynïaid kali (Traffic) ka dei ruh ban buh kham bun ki pulit ba kin pynïaid ïa ki kali ha ka thaiñ ha kine ki kynta shong dukan madan ba la pynjlan.
Ha ka aplikeshon jong ka, ka Meghalaya and Greater Shillong Progressive Hawkers and Street vendors Association ka la ong ba ka nongrim ka long ba ka por ba ai ban shong die dukan kam shym ai jingshakri ïa ka jingthmu ba la ai ïa ki, kata ban pynthikna katto-katne ka kam khaïi sha ki nongdie jingdie ha surok kiba la ïoh laisen ha Khyndailad, haduh ba kin da shah pynkynriah ha ka Sorkar sha ki jaka ba la buh kyrpang. Ha ka hukum ba nyngkong, ka por ba la ai ban shong die jingdie ka long naduh 12:30 mynsngi haduh 2 baje janmiet bad naduh ka 7:30 janmiet haduh 9 baje mynmiet.
U P. Yobin, nongïasaid na ka bynta ka aplikeshon ba la aiti, ba katto-katne ka por la shim noh ha kaba buh ïa ki dukan bad lum ïa ki dukan. Baroh hapoh kane ka por ba la khang ka pynduna ïa ka kam khaïi bad ka wanrah jingeh ïa ki nongdie madan.
Ha kawei pat ka liang, u Advocate General u la pyrshang da kaba tyngeh bha ban pynsngewthuh ïa kane ka ïingbishar ba don ki “khwan myntoi” kiba donkti sha lyndet jong kane ka jingpan jingbit. Ka Sorkar ka la shim ïa baroh ki lad ki lynti ban pynthikna ba ïa kine ki nongdie madan yn pynkynriah noh hapoh ka 22 tarik u Naitung, 2025, u la ong.
