Shillong, Naitung 16
U Special Officer ba la thung da ka Meghalaya High Court, u Subhasis Chakrawarty ha ka Sngi Balang u la bthah ïa ki bor distrik ka East Khasi Hills ban ïaid shakhmat bad ka jingpynkynriah ïa ki nongdie madan ha ka thaiñ Khyndailad katkum ki jingbthah jong ka ïingbishar.
Haba kren sha ki lad pathai khubor hadien ka jingïalang ha ophis ka Deputy Commissioner, u Chakrawarty u la ong ba ka jingïalang ka la long kaba seisoh hapdeng ki kynhun halor kumno ban ïaid shakhmat bad ka jingpynkynriah kumjuh ka jingai ïa ki syrnot die jingdie ne ‘Certificate of Vending’ (CoV).
“Kumta, ki bor pynïaid mynta kin ïaid shakhmat (bad ka jingpynkynriah) katkum ki rai ba la shim halor kane ka kam,” u la bynrap.
Haba kylli, une u ophisar u la pynpaw ïa ka rukom treikam kaba ap bad peit, da kaba ong “To ngin peit kumno ka ïaid shakhmat. Ngin sa tip shaphang kane katba ki kam ki nang ïaid shakhmat.”
Ha kane ka jingïalang la ïadonlang ki ophisar na ki bor distrik, Shillong Municipal Board (SMB), ki dkhot ka Provisional Town Vending Committee (PTVC) bad ki dkhot ka Meghalaya and Greater Shillong Progressive Hawkers and Street Vendors Association (MGSPHSVA).
Hashuwa, ha ka 13 tarik Naitung, une u ophisar u la ai jingmut ïa ka bor distrik ban ym ïaid shakhmat bad ka jingkyndang ïa ki nongdie madan ha Khyndailad da kaba kdew ïa ka hukum jong ka High Court ha ka 3 tarik Naitung, kaba bthah ban pynkhreh ïa ka thup kyrteng jong ki nongdie madan ba la ai jingbit ne kiba la ïoh laisen da kaba ïamir jingmut lang bad ka seng ki nongdie madan bad ki bor pynïaid.
Ïa katei ka thup kyrteng, katkum ka jingbthah ka High Court, ym pat lah ban pynkhreh haduh mynta – ha kawei ka liang, kaba la pynlong ïa ka jinglong-jingman jong ki nongdie madan ha katei ka thaiñ, ka bym pat lah ban pynbeit.
U ophisar ha ka shithi sha ka Deputy Commissioner u la ong ba kano-kano ka jingkyndang ha kum kane ka por kan long ka jingpynkheiñ kaba shai ïa ka hukum jong ka High Court.
Ha ka hukum kaba la pynmih ha ka 3 tarik u Naitung, ka High Court ka la ong: “(ii) Hapoh jong u Special Officer bad ha ka jingïamir jingmut bad u General Secretary, ka seng ki nongdie madan, ki bor pynïaid bad bor pulit kin pynkhreh ïa ka thup kyrteng jong ki nongdie madan kiba la ïoh jingbit ne kiba don laisen ïa kaba la ong ba ki don kumba 349 ngut.”
Ka Ïingbishar ka la bthah ba yn shah ïa ki nongdie madan kiba don laisen ban die jingdie ha ka thaiñ Police Bazar ha ki kynta ba la buh (12:30 baje mynsngi haduh 2 baje nohphai sngi bad 7:30 baje mynmiet haduh 9 baje mynmiet), katkum ka jingkular jong ki ban ym palat ïa ka por ba la buh ne ban pynthut ïa ka leit ka wan jong ki kali ne ka ïaid ka ïeng jong ki briew. Yn ym shah ïa ki nongdie madan ki bym don laisen ban die jingdie ha katei ka thaiñ.
Ka Ïingbishar ka la bthah ruh ba ki nongdie madan kin kynriah sha kiwei pat ki jaka die jingdie shisien ba la pynbiang da ki bor pynïaid, bad kiwei pat ki nongdie madan ki lah ban aplai na bynta ki laisen kiba biang.
Shuh shuh la bthah ïa u Special Officer ban pyntikna ïa ka jingpyntreikam kaba suk ba saiñ ïa ki hukum jong ka Ïingbishar bad ban aiti ïa ka kaiphod hapoh ka 5 tarik u Nailar, 2025.
