Khliehriat, Naitung 16
Ka lympung ïalehkai 2nd Division League Stage ba la pynïaid da ka East Jaiñtia Hills District Football Association (EJHDFA) ka la sdang ha ka Sngi Balang ha madan Artificial Turf Diengshynrum kaba ha Khliehriat.
Ha ka jingïakhun kaba nyngkong, ka Mulieh YW SC Suchen ka la pynliem noh ïa ka Moosiang Lamare New YWO SC da 2-0 kol. Ïa kine kol la thep da u Piles Sumer (9) bad u Firterjoy Pariat (13).
Ka Moosiang Lamare Old SC bad ka Moolamanoh SC ki la ïakhaid mar 1-1 kol. Ïa ka kol jong ka Moosiang Lamare Old la thep da u Primi o Muksor (39), hynrei shwa ban wai ka Moolamanoh ka la ïoh ei shi na ka daw ka jingbakla thep da u rangïalehkai ka liang pyrshah u Pressamla Syrti (78) na ka bynta ban ïakhaid mar shi kol.
Ha kawei pat ka jingïalehkai, ka Lakadong Umlatdoh SSC ka la jop da 2-0 kol ïa ka Dkhiah West SCSO. Ïa kine kol la thep da u John smill Amkhloo (23) bad Pynshaibha Amkhloo (70).
Ïa kane ka lympung la plie da u Bah Joshwa Sajem, Vice President ka East Jaiñtia Hills District Football Association (EJHDFA) kum u kongsan ha ka jingdonlang ki nongïalam bad nongkitkam ba kynthup ïa u Bah Mehiwot Shadap, Working President, Bah James Sutnga, General secretary, Bah Wilbert Nongtdu, Working President Tournament, Bah Embhahlang Lamurong, Secretary Tournament bad Rymphang Nongtdu nalor kiwei kiwei.
Ha kane ka sngi u kongsan u la ai sngewbha ruh da ki sopti ïalehkai (jersey) sha baroh ki rephri kiba pynïaid ïa kane ka lympung.
