Shillong, Naitung 16
Ka Meghalaya State Kickboxing Association (MSKA) ka la sei ïa ki 16 ngut nongïalehkai ban mihkhmat ïa ka Jylla na ka bynta ban leit shim bynta ha ka Seniors & Masters – Men/Women National Kickboxing Championship 2025 kaba la sdang naduh 16 haduh 20 tarik mynta u bnai ha Balbir Singh Juneja Indoor Stadium, Raipur Chhattisgarh.
Ïa kane ka lympung yn pynïaid da ka Kickboxing Association of Chhattisgarh hapoh ka jingkhmih jong ka WAKO India Kickboxing Federation.
Ka kyrteng ki nongïalehkai ki kynthup ïa u Dipuline R. Marak na Tura Lower Danakgre, WGHD ha ka K1 Rules -75kg, ka Banisha Suïam (Shangpung Mission WJHD) ha ka Light Contact -50kg, Nibarisa Ïakai (Shangpung Khliehmushut WJHD) ha ka Kick Light -45kg, Sweety Kumari Thakur (Shangpung Moosyiem WJHD) ha ka Light Contact -50kg, Kynsaimiki Soyoo (Nongkynrih, West Jaiñtia Hills) ha ka K1 -63kg, Lumjingsuk Ïawphniaw (Mawten, SWKHD) ha ka Low Kick -51kg, Wallambok Nongsiej (Mawten SWKHD) ha ka Low Kick -60kg, Kularskhem Marngar (Mawkamoit EWKHD) ha ka Low Kick -54kg, Sakibanshai Nongbri (Mairang Massar EWKHD) ha ka K1 Rules -51kg, Daniella I.W Mylliemngap (Upper Lumparing Lumdorbar) ha ka K1 Rules -60kg, Medariphylla L. Nongbri (Smit Lemthaw, EKHD) ha ka K1 Rules -56kg, Fourwell Khongmalai (Wahkdait Village Pymursla EKHD) ha ka Point Fighting Veteran -54kg, Fourwell Khongmalai (Wahkdait Village Pynursla EKHD) ha ka Kick Light Veteran -54kg, Adialmarphi Nongdhar (Pohkseh West 3, EKHD) ha ka K1 Rules -51kg, Gregory Ferando Sohtun (Lummawbah Mawbynna, EKHD) ha ka Rules K1 -67kg, Banpynshailang Laso (Nongjri Village Pymursla EKHD) ha ka Low Kick -57kg, katba u Khrawjutang M. Kharsyntiew (License Coach Kickboxing na Mairang Pyndenumïong).
Kat kum ka kyrwoh ba la pyllait da katei ka synjuk la ong ba ka MSKA naduh u Nailar 2017 haduh u Jylliew 2025 ka la khur 90 tylli takma ksiar, 66 tylli takma rupa bad 92 tylli takma rnong. Haba kheiñ lang baroh, ka MSKA ka la khur 248 tylli ki takma hapoh ka ri bad 53 tylli ha ki lympung bar ri lem bad 9 tylli ki takma na ka bynta ka NEHU ha ka All India Universities Games naduh u snem 2019.
