Shillong, Naitung 16
U samla Enlang Sawian kum uwei na ki nongïasaid aiñ ha ka Jylla ha ka Sngi Balang ka 16 tarik u Naitung 2025, u la leit ban ujor sa sha ka ophis jong ka National Commission for Schedule Tribe (NCST) kaba dei ka shlem treikam ban peit tang na ka bynta ki riewlum pyrshah ïa u Sushil Guru uba la kam ïalade kum u pandit bad ïa u Youtuber u Raghav Sharma uba la pyllait ïa katei ka durkhih ne video khlem da wad bniah ïa ki jingkren.
Kane ka jingbuddien une u samla ïa kane ka kam ka dei hadien ba utei u pandit haba kren ha kawei ka channel lyngba ka jingïakren bad u youtuber, ha kaba u la kam ba ka don kawei ka shnong ha Meghalaya ha kaba ki dang pynlong ïa ka jingkñia briew bad ka jingbam briew katkum ka niam ka rukom.
Haba kren sha ki lad pathai khubor, u samla Enlang u la ïathuh na ka liang ka ophis jong ka Human Commission For Schedule Tribe ka la ai jubab ba kane ka kam kan kham shim por namar hap phah shaduh Delhi, hynrei na ka liang ka Commission kan nang ai jingpyntip sha une u samla. U la ïathuh ruh ba haduh mynta ïa ka ejahar kaba u la buh sha thanat Lumdiengjri kam don pat kano-kano ka jubab sha u hynrei na ka liang jong u un nang buddien bad un sa leh ïa kaba donkam.
U samla Enlang u la kyntu ïa ka Commission ba kin pynïaid ïa ka jingtohkit, ha kaba u la buh ka jingkyrpad lyngba ka Article 338 A jong ka riti synshar jong ka ri India kaba aibor ïa ka Commission ba kan tohkit ïa ki jingujor kiba la buh, ha kaba ïadei bad ka jingshah ktah lane ka jingshah kynthoh bad ka jingshah ban beiñ shah ibeiñ jong kita ki riewlum kiba hap hapoh kane ka National Commission for Schedule Tribe (NCST).
Kane ka jingkren jong une u pandit da kaba pyrshang ban kren beiñ ïa ngi ki riewlum ka Jylla bad khamtam eh ka jingthmu jong u ban wanrah ban pynthut ïa kata ka shong suk shong shngaiñ hapoh ka jylla Meghalaya.
U la kyntu ruh ïa ka Commission ba kan shim ïa kita ki Appropriate Legal Action ha ki section jong ka BNS bad kumjuh ruh ha ka Prevention of Atrocities Act Against ST 1989. Da kaba ngeit skhem ba hadien kane ka jingujor jong u na ka liang ka Commission kan sa leh da kaba tyngeh halor kane ka kam.
“Da kaba pyntikna ruh ba kine ki briew kiba kynthoh ïa ka Jylla jong ngi bad ïa ki riewlum jong ngi, kin ngat ha ka jingpynsaja,” la ong u samla Enlang.
Ha kawei ka liang pat u samla Enlang u la pynrem ïa ka Police Department bad ïa ka Sorkar Jylla, namar haba ngi phai sha kiwei-kiwei ki Jylla kum ka Sorkar Assam, hadien ba la don uwei u youtuber uba la kynthoh pyrshah ïa ka jylla Assam bad ki pulit ki leit tan ban wanrah sha ïingbishar ka Assam, hynrei ka jylla Meghalaya pat da ki phew tylli ki FIR ba la dep ujor pyrshah ïa ki bar jylla, hynrei ka sorkar bad ki pulit kam shym leh eiei.
Da kaba kynnoh ruh ba ka Sorkar Jylla kam nud ban leh eiei namar ba ka tieng ïa ka BJP.
