Shillong, Naitung 16
Ka ïingkashari jong u M Kumar, Special Judge (POCSO) ka West Khasi Hills ka la rai pynrem da kaba hukum set patok shi jingim ïa ki ar ngut runar kiba donkti ban leh be-ijot ïa kawei ka khynnah rit.
Ïa kane la pyntip da u Superintendent of Police ka Eastern West Khasi Hills u Bah Dangsan Khyriem ha ka kyrwoh khubor ba la pyllait.
La ong ba kine ar ngut kiba la shah rai pynrem ki dei ba la tip kyrteng kum u Mebanlang Warjri bad u Tony Paul Basaiawmoit kiba dei trai shnong na Pyndengumïong ha EWKH. La ong ba ha ka 8 tarik Jymmang, 2017, la ïoh pdiang ïa ka ejahar (FIR) pyrshah ïa kitei ar ngut, ba ki la donkti ban leh be-ijot ïa kawei ka khynnah rit. La register case lyngba ka thanat Mairang, Case No 22(05)2017 u/s /6 POCSO Act bad la pynïaid shakhmat ïa ka jingtohkit da ka WPSI DP Nongbri bad la pynngat ïa ki hapoh ki kyndon ka POCSO Act.
Hadien ba la tiañ bishar ïa ki, la pynmih ïa ka hukum ha ka 25 tarik Jylliew, 2025 ban rai pynrem ïa ki da kaba set patok shi jingim (life imprisonment) ryngkat ka kuna kaba T. 50,000.
