Shillong, Naitung 16
Ka jingbym biang por ki nongwan trei Sorkar ha ka por mynstep ha ki jaka treikam bapher-bapher ka dei kaba ju ktah jur ïa ki paidbah nongwan donkam ha ki shlem treikam. Kane ka dei ruh ka jingleh kaba ki paidbah ki la ju pynpaw na ka por sha ka por.
Hynrei kane ka jingleh jong ki nongtreikam Sorkar ka dang ïai bteng beit tad haduh kine ki sngi kiba mynta ruh. Kumba ka dei ban long ki nongtrei Sorkar ki dei ban poi trei ha ka por 10 baje mynstep hynrei la lap pat ba ki ju wan poi palat ïa ka 10 baje shaneng.
Kum kane ka jingjia ka la jia ha kaba uwei u rangbah ïa uba la buhrieh kyrteng ïalade, u la pynpaw ka jingsngewkhia bad ka jingsngewbitar shikatdei eh hadien ba u la lap ba wat haduh ka por 11:24 baje mynstep ruh ym pat shym la don nongtrei hapoh ka shlem treikam jong ka State Transport Authority (STA) bad na ka liang une u rangbah u la ring syndon da ka durkhih ban pynshisha halor kane ka jinglap jong u.
Na ka liang utei u rangbah u la pynpaw ka jingsngewkhia kaba jur halor kane ka jingbym wan trei biang por ki nongtrei ha kane ka ophis da kaba ong ba kane ka jingleh jong kiba trei kam Sorkar, ka la tuh bha ïa ka por jong ki paidbah kiba wan donkam ha katei ka ophis treikam khamtam lada dei ki kam kiba kyrkieh.
Shuh-shuh, u la pynpaw ba ha ka jaka ba ki kam ki jam kin dep tang hapoh shisngi hynrei la hap ban wan bad pynlut por bun sngi ka por bad kumjuh ka bai leit bai wan.
