23 tarik yn lum ka Sorkar ïa ki MLA

Ka Myntri tnat ka Koit ka Khiah, Kong Ampa-reen Lyngdoh, ka la pyntip ba ka Sorkar ka la rai ban pynlong ïa ka jingïalang bad baroh ki MLA na ka thaiñ East Khasi Hills District...

Shillong, Naitung 17

Ka Myntri tnat ka Koit ka Khiah, Kong Ampa-reen Lyngdoh, ka la pyntip ba ka Sorkar ka la rai ban pynlong ïa ka jingïalang bad baroh ki MLA na ka thaiñ East Khasi Hills District ha ka 23 tarik Jylliew ban ïakren ïa ki mat ba kyrkieh jong ka jingdih drok bad ka jingpang HIV/AIDS.

Katkum ka jingong jong ka, kane ka jingïalang ban pynïaid da u Symbud Myntri Rangbah ka jylla u Bah Prestone Tynsong, ka thmu ban thaw buit bad ban wanrah ïa ka buit ban pynduh jait bad khanglad ïa ka jingsaphriang jong kine ki jingeh ha kane ka thaiñ.

Ka Kong Ampareen ka la kren bad pynpaw ïa kane, haba ai jingkren ha ka jingïalang kaba la pynlong da ka Dorbar Shnong Lachaumiere ha ka Sngi Palei ban kynmaw burom ïa ka lyngkhuh sngi ïap kaba 190 snem jong u Tirot Sing Syiem.

“Ngi (Sorkar) ngin shong bad baroh ki MLA jong ka East Khasi Hills district ha ka 23 tarik Naitung ban ïakren, ban thaw buit treikam bad ban wanrah ïa ka plan ban khanglad ïa ka jingsaphriang jong ka jingpang HIV/AIDS bad ban rat dyngkhong ïa ka jingma jong u drok napoh ka district,” la ong ka Kong Ampareen.

“Nga kyrmen ba kane kan long kawei na ki rynsan ban ïakren bad ban pyni lynti ïa ngi kum ka tnat ka Health bad Social Welfare khnang ba ngin pynthikna ba ki prokram kiba ngi shim ki long kiba treikam,” ka la bynrap.

Ka Myntri ka la ban jur ruh ïa ka jingdonkam jong ka jingïashim bynta lang jong ki paidbah ha kaba weng ïa kine ki jingeh, da kaba pynpaw ïa ka bynta jong ki dorbar shnong, ka imlang-sahlang, bad ki pulit ban pynthikna ba ki briew kiba shah ktah ha ka jingdih drok bad ka jingpang HIV/AIDS kin ïoh ïa ka jingkyrshan bad jingsumar kaba donkam.

“Ngin sa shimkhia ïa kane bad ngin sa pynlong ïa ki jingïashim bynta kiba ryntih jong ki shnong ki thaw, ki kmie ki kpa, ki samla, ki tymmen, baroh khnang ba ngin lah ban teh lakam ïa kane,” ka la ong.

Ka Myntri ka Koit ka Khiah ka la ban jur ïa ka jingdonkam ban pynpra ïa ka jingshah ñiewbeiñ bad jingshah lehbeiñ kaba ïadei bad ka HIV/AIDS bad ka jingdih drok, da kaba pynshlur ïa ki jingïakren ba laitluid bad ka jingïashim bynta lang jong ki paidbah ban tehlakam ïa ka jingsaphriang jong kine ki jingeh.

Shuh shuh ka Kong Ampareen ka la pynpaw ruh ïa ka bynta kaba kongsan jong ka jingïatreilang jong ka longïing bad ka imlang-sahlang ha kaba ïada na ka jingdih drok bad ka jingpang HIV/AIDS, da kaba kyntu ïa ki kmie ki kpa ban ïakren bad ki khun shaphang kine ki jingeh bad ba ka imlang-sahlang kan ïawan lang ban weng ïa ki.