Shillong, Naitung 17
Ha kawei ka jingjia kaba sngewsih kawei ka long-ïing ka la ngat bih na ka bam ba ki shet bad jan baroh shi ïing ki la ïoh pang kynsan na katei ka jingjia. Iwei pat ba ngat ha kane ka apot ba la tip kyrteng kum Shailynti Marngar, 15 snem ka rta, i la khlad noh na kane ka jingjia.
Kane ka jingjia ngat bih ka dei kaba la jia ha ka 12 tarik mynta u bnai, ha ka por ba katei ka longïing ka la pynlong ïa ka jingkhawai dap sngi kha ïa ka para ka Shailynti Marngar, bad ha ka 13 tarik ki la bam ïa ki jingbam ha ïing bad kynsan-kynsan ki la khie pang.
Kiba ngat ha kane ka apot ki dei na ka shnong Mawriang Tynnai kaba hap ha Mairang C&RD Block.
Ha ka jingïakren bad u Bah Kar Rani, kpa jong katei ka heprit (ba la khlad noh) lyngba ka phone, u la ïathuh ba kane ka jingjia ngat bih ka lah ban dei na ki jingbam ba ki bam bad shet ha katei ka sngi.
U la ïathuh ruh ba u don khun 11 ngut. Napdeng kine, 2 ngut ki khun ba dangrit ki lait na kane ka jingshitom katba baroh pat ki la shitom jur bad la pynkit mar-mar sha Nongum PHC, Kynrud PHC bad sha Mairang PHC.
“Ka Shailynti bad u hynmen ki dang don ha ïing, namar ba kim pat shitom eh haduh katta-katta hynrei ha ka por mynmiet pat jong ka 14 tarik u Naitung, ka Shailynti ka la shitom kynsan-kynsan bad shwa ban shai ka bneng la pynkit sha Nongum PHC, hynrei ha shiteng lynti ka heprit Shailynti ka la khlad noh,” la ïathuh u kpa.
Katkum ka jingïathuh jong u kpa, u la ong ba ka jingngat bih ka lah ban dei beit na ki jingbam ba ki bam ha ïing namar ba ki shet ruh ïa ki jingbam ba la sah miet.
U la ïathuh ba kam dei ba ngat bih na u sohsaw, katkum ka jingmih ha kawei ka khubor ba la pyllait hapoh youtube dang ha kine ki sngi, hynrei kane ka jingngat bih ka dei beit na ki jingbam ba ki shet.
Shuh shuh u la ïathuh ba u la wan thied tang u kubi na ïew, hynrei ki jingbam baroh u la thied na shnong lajong bad ruh bun ba shet na ki jingbam ba thung hi. Kumta u la ong ba ka jingngat bih jong ki, ka lah ban dei beit na ki jingbam ba ki shet ym na u sohsaw.
Baroh kiba ngat bih na katei ka longïing naduh ka kmie, u kpa, ki hynmen jong ka heprit Shailynti Marngar mynta ki la kham khlaiñ, bad ki la wan phai sha ïing.
Ïa ka met ba sah jong ka heprit Shailynti Marngar, ki bahaïing bahasem ki la dep leh burom khatduh hynnin ka Sngi Balang ka 16 tarik u Naitung 2025.
