Shillong, Naitung 17
Ka MDC na Nongshken Constituency ka Kong Grace Mary Kharpuri kaba dei ruh ka President ka Women Wing jong ka NPP Meghalaya ka la ong ba ki don ki seng saiñpyrthei kiba kwah jubor ïa ka bor bad burom kat haduh ba kim don shuh ka mynsiem sngewnguh.
Ka Kong Grace ka la pynpaw ïa kane dei haba ai jingkren ha ka sngi buh syntiew ka NPP Meghalaya unit ïa u motdur ba shirynïeng jong u Tirot Sing Syiem ban kynmaw burom ïa ka sngi khlad kaba 190 kaba long ha ka Sngi Palei ha phyllaw ka State Central Library, Shillong.
Ka Kong Grace ka la ai jingmut ïa ki nongkitkam ka NPP ba ki dei ban kynmaw burom ruh ïa ka Phan Nonglait da kaba tei ïa u mot namar kane ka longkmie ka la don bynta ban ïarap ïa u Syiem Tirot Sing ban ïakhun ïa ki shipai phareng ha ki por mynshwa.
Ha kane ka sngi la ïadonlang u Bah Wailadmiki Shylla, MLA na Jowai uba dei u President ka NPP Youth Wing, Bah HM Shangpliang, nongaiktien ka NPP bad la pynïaid ïa ka jingïalang da u Bah Hamlet Dohling uba dei u Working President ka NPP Meghalaya Unit.
Ha kane hi kajuh ka jaka, u Bah Augustine Syiemlieh uba dei u Vice President ka Kur Syiemlieh, Shillong Unit u la kyntu ïa ka Sorkar Jylla ba ka dei ban ai beit pura ïa ka kyrteng u Tirot Sing Syiemlieh ym dei ban shu ai tang Tirot Sing namar kane ka pynsngewsih ïa ka Kur Syiemlieh namar kim pynpaw ïa ka jait jong u riewkhraw jong ka jaidbynriew.
Haba ai jingkren ha ka jingïalang kaba lyngkot haba leit buh syntiew da ka Kur Syiemlieh Shillong Unit ha u mot ba shi rynïeng u Tirot Sing ha phyllaw ka State Central Library Shillong, u Bah Augustine u la pynkynmaw ba ar snem mynshwa u Conrad K Sangma, Myntri Rangbah ka jylla u la kular ha jingïalang ha Mairang ban sa pynbeit noh ïa baroh ki motdur jong u Tirot Sing ban ai pura ïa ka jait Syiemlieh.
U la ong biang ba haduh mynta ka Sorkar kam pat leh ïa kane namar ka Kur Syiemlieh ka kwah ban ai beit da ka kyrteng u Tirot Sing Syiemlieh ha baroh ki jingthoh.
Ha kane ka sngi la synranlang da u Bah Embhah Syiemlieh, u MLA bad MDC barim ka Mawlai, ki longkmie bad ki longkpa na ka Kur Syiemlieh ba la pynïaid ïa ka jingïalang da u Bah Susil Syiemlieh, Secretary ka Kur Syiemlieh Shillong Unit.
