Shillong, Naitung 17
U Lat ka Jylla u C.H Vijayashankar u la khot sngewbha ïa ka samla Rifiness Warjri ban ïashim bynta ha ka jingrakhe ïa ka Independence Day ka ban long ha ka 15 tarik u Nailar mynta u snem ha Raj Bhavan.
Ïa kane u la pynpaw hadien ba u la ïakynduh ïa katei ka nongkiew lum kaba dang 20 snem ka rta ha Raj Bhavan ha ka Sngi Balang. Dangshen, ka Rifiness ka la lah ban poi sha kliar jong u lum bajrong tam ha ka pyrthei, Mount Everest ha ka 18 tarik u Jymmang mynta u snem.
Ka Rifiness kaba dei ka dkhot jong ka NCC cadet bad kaba dang pule B.Sc (Botany) ha ka St. Anthony’s College, ka la pynkyndit ïa u Lat ka Jylla da kaba rwai ïa ki ar tylli ki jingrwai – ka jingrwai ïeit ri bad ka jingrwai Khasi kaba pynkhih mynsiem – kaba pyni ïa ka jingïadei jong ka kolshor bad ka jinglah ban leh bun ki kam jong ka nalor ka jingkiew lum. Na ka liang u Lat u la ïaroh ïa ka sap shna dur jong ka bad ka jingsarong kaba jylliew bha ïa ka pateng jong ka Meghalaya.
U la pynpaw ba ka Rifiness ka pynpaw ïa ka mynsiem jong ka jingkut jingmut bad ka jingsngew sarong ïa ka kolshor. “Ka jingdon jong ka ha ka prokram sngi laitluid jong ngi kan long ka jingburom ïa ka jingai mynsiem jong ka ïa ki samla bym lah kheiñ ha kylleng ka Jylla,” la ong ka kyrwoh.
Ha shwa ba kan kiew ïa u lum Everest, ka Rifiness kaba la kha ha Nongthymmai bad kaba la heh la san ha Laitkor, ka la kiew ïa u lum Abi Gamin ha u Nailar 2024 hapoh ka jingpeit jong ka NCC. Kane ka samla jong ka 61 Meghalaya Girls Battalion NCC, ka la long ka kynthei kaba lai na ka jylla ban poi sha kliar u lum Everest ha ka por kumba 4:45 mynstep ha ka 18 tarik Jymmang 2025, hadien jong u Gary Jarman Lamare ha u snem 2012, ka Kong Wansuk Myr-thong ha u snem 2013, ka Dolyne Kharbhih ha u snem 2016.
