Shillong, Naitung 17
Ki pulit jong ka East Khasi Hills ki la ïoh ban kem noh ïa ki ar ngut nongtuh kiba la kynnoh ba ki pajut ïa ki jingdeng ksiar jong u briew ne ka briew bym pat ithuh kyrteng satia. Ka jingïoh kem noh ïa kine ar ngut ka la long hadien ba la thwet ïa ki halor ka jingïoh jingtip ba ki la tuh ïa u jingdeng ksiar.
U Superintendent of Police (City) ka East Khasi Hills, Bah Herbert Kharkongor u la pyntip ba ki pulit ki la ïoh jingtip ha ka 16 tarik Naitung, 2025 ba ka don ka jingshah tuh jingdeng ksiar ha Polo, kumta ki pulit hapoh ka jingïalam u SI I. Warjri, ryngkat ka jingïarap u UBC/ A.D Sangma bad ki pulit CRPF, ki la ïoh ban kem noh ïa ki 2 ngut kata u Kenny Kharmujat ba dang 24 snem rta bad u Subroto Baidya, 32 snem kiba dei na Lumshyiap, Nongmensong, kiba la suba ba ki dei ki nongpyndonkam drok.
Kine ar ngut hadien ba ki la dep tuh ki la phet krad noh sha ka thaiñ Khyndailad lyngba ka Jail Road ha kaba ki pulit ha katei hi ka sngi ki la thwet ïa ki bad la ïoh ban kem najan Kim Hyundai Showroom kaba don ha Golflink ha ka por kumba 11:45 mynmiet bad ki la ïoh ban kurup noh ïa utei u jingdeng ksiar na u Kenny Kharmujat.
Kumta, na ka liang jong ki pulit ki la kyrpad ïa ki nongshong shnong kiba lah ban shah tuh dang shen lane shah tuh jingdeng ksiar ba kin wan shakhmat bad ujor da ka ejahar ha thanat Sadar. Kane kan pynlah ïa ki pulit ban leh ïa kaba donkam bad ban pynsuk ban pynphai biang ïa ka ksiar ba la ïoh kurup sha u/ka trai ba dei hok, u la ong.
U SP (City) u la ong, ki pulit jong ka East Khasi Hills ki dang ïai bteng ban pyntreikam stet, hok, bad khuid ïa ka aiñ bad ki kyntu ïa ki nongshong shnong ban ïarap ïa ki pulit ban pynthikna ba ki lanot kin ïoh ïa ka hok.
