Khliehriat, Naitung 17
Ka Diengshalalu SC, Khliehmyntriang SCSC, Khliehriat West FC bad Tuberkmaishnong SCC ki la ïakhaid katba ka Wapung Shnong SSC ka la ïoh jingjop ha ka lympung ïalehkai 2nd Division League Stage ba la pynïaid da ka East Jaiñtia Hills District Football Association (EJHDFA) ha ka Sngi Palei.
Ha kane ka jingïakhun kaba la long ha madan Artificial Turf Diengshynrum kaba ha Khliehriat hapdeng ka Diengshalalu SC pyrshah ïa ka Khliehmyntriang SCSC bad ka Khliehriat West FC ïa ka Tuberkmaishnong SCC ki la ïasam mar shi point hadien ba ki la ïakhaid mar 1-1 kol.
Ïa ka kol jong ka Khliehmyntriang la thep da u Arun Dkhar (13), na ka bynta ka Diengshalalu la thep da u Khmihbha Rymbai (17), katba ïa ka kol jong ka Khliehriat West la thep da u Chanbor Malang (52) katba ïa ka Tuberkmai Shnong la thep da u Coming Dkhar (74).
Katba ha ka jingïalehkai kaba bud ka Wapung Shnong ka la pynliem noh ïa ka Wapung Skur SSWO da 1-0 kol bad ïa kane la thep da u Wanphaibiang Dkhar (20).
