Shillong, Naitung 17
Ka Hynñiewtrep Youths’ Council (HYC) ha ka Sngi Palei ka 17 tarik u Naitung 2025 kum shibynta ban kynmaw burom ïa ka sngi ïap ba 190 jong u Syiem Tirot Sing uba dei Syiem ka Hima Nongkhlaw ka la plie paidbah ïa u mot dur ba shirynïeng jong u Tirot Sing ha Laitarted, Eastern West Khasi Hills District.
Ïa u mot dur ba shirynïeng jong u Syiem Tirot Sing la plie paidbah da u Syiem Khynnah ka Hima Nongkhlaw u Dr. K.M. Syiemlieh ha ryngkat ka jingïadonlang u Myntri ka Hima Mylliem u M.B Kharlukhi, President Rangbah ka HYC u Bah Roykupar Synrem, President barim Bah Robertjune Kharjahrin, ki nongïalam ba hakhmat ka seng bad ki dkhot ka seng, ki longkmie longkpa haduh ki khun samla. La pynlong ruh ka jingbuh syntiew da ki nongïalam bad ki dkhot ka seng bad kiwei-kiwei kiba la wan lang ha kane ka sngi hakhmat motdur u Tirot Sing.
Haba ai jingkren ha kane ka sngi plie ïa u motdur u Syiem Tirot Sing, na ka liang u Syiem Khynnah ka Hima Nongkhlaw u Dr. K.M. Syiemlieh u la ong ba une u mot jong u Tirot Sing ba pynïeng mynta un ïai sah junom bad ma ngi pat ngin sa leit noh.
U la ïathuh ba u Tirot Sing u dei u Syiem ba shiphew napdeng ki syiem hapoh ka Hima Nongkhlaw.
Nalor kane, u la ai ka jingkhublei ïa u President Rangbah ka HYC bad ruh ïa ki nongïalam ba hakhmat kiba la shim ïa kane ka sienjam kaba nyngkong eh ban tei ïa ka nam ka burom jong ki ‘riewshlur kiba naduh ka snem 1829 kiba la ïeng na ka bynta ban laitluid ka ri kaba ieid jong ngi na ka kti shah thombor jong ka sorkar phareng.
“Kane ka jingshlur jong u Syiem Tirot Sing ka long ka nuksa, ka matti bad kam shym la kut tang ha u, hynrei ka dei ka matti ka nuksa na ka bynta jong ngi kiba dang im bad kan ïai long ruh ka nuksa na bynta ki pateng ban dang wan jong ngi ki Khasi-Jaiñtia,” la ong u Syiem Khynnah.
U la ong ba kane ka sngi kam dei tang ka jingsah jingkynmaw ïa ka sngi ïap jong u Tirot Sing, ha ka hima jong ngi ka la dap ruh 500 snem naduh ba la seng ïa ka da kita ki Phra Lyngdoh ha kaba ka la kylla long ka Hima Khatsawphra hadien ba la pynïasoh sa ki khatsaw tylli ki raid bad hadien kata ka la kylla long ka Hima Nongkhlaw.
“Nyngkong u phareng u jer kyrteng ïa ka Hima Nongkhlaw da ka Hima Syiemlieh namar ba la synshar nyngkong ïa kane ka hima na ka kpoh jong ki Syiem ba la wan nyngkong u Shahjer bad hadien kata u Syiem Tirot Sing u dei u Syiem ba shiphew na kane ka hima,” la bynrap u Syiem Khynnah.
