Dhaka, Naitung:
Ki bor pahara jong ka Bangladesh ha ka Sngi Balang ki la ïakhun da ka bor bad ki nongkyrshan jong ka Sheikh Hasina, ka nongialam jong ka Bangladesh, kaba la shah pynhiar shuki noh ha ki por ba la leit, ha kaba ym duna ïa 4 ngut ki briew ki la ïap bad da ki phew ngut pat kiba la mynsaw ha katei ka jingkulmar hapdeng ki bor pahara bad ki nongkyrshan jong katei ka nongialam barim ka Bangladesh.
Ka jingïakynad ka la khie ha ka por mynstep bad ka la saphriang hapoh ka jingpynkhih win jong ki nongkyrshan katei ka seng ïa ka jingïaid paidbah sha ka thaiñ Shatei Lam Mihngi jong ka distrik Gopalganj, ka jaka sah jong ki kpa tymmen jong ka Hasina bad ka jaka ba bun tam eh ki nongkyrshan jong ka seng Awami League.
Hadien kata ki bor synshar ki la pynjari da ka pakhang shnong shi miet ha katei ka distrik.
Naduh ba la pynhiar shuki ïa ka Hasina 11 bnai mynshwa, ka Bangladesh ka la sakhi ïa ka jingkulmar bad ka jingïakynad jong ki paidbhur khlem da lah ban khang lad ia kiba kum kine ki jingjia, na ka por sha ka por. Katei ka jingiakulmar ha ka Sngi Balang ruh ka pynpaw ïa ka jingïapher jingmut kaba jur hapoh katei ka ri namar ba ka sorkar ba shipor jong ka, ka dang ïai bteng ban pynïaid beit ïa ka jing-long-jingman jong ka jingïada kaba nang pulom bad shong syier ha kine ki sngi.
Katkum ki dur ba la saphriang paidbah ha ki rynsan social media, la iohi ia ki nongkyrshan jong ka Hasina kiba la kieng atiar ban hiar thma ia ki pulit da ki dieng bad ban thang ruh ia ki kali katba ka kynhun kali kaba don kumba 20 tylli kiba kit ia ki nongialam jong ka National Citizen Party jong ki samla pule ka la poi kum shi bynta ban kynmaw ia ka jingiakhih.
