Alaska, Naitung:
U jumai ba 7.3 Magnitude u la pynkhynñiuh ia ka thaiñ rud duriaw jong ka nongbah Alaska jong ka US ha ka Sngi Balang, ha kaba ka US ka la maham ba ka lah ban don ka jingkhie atphyllung bad ‘eriong.
Utei u jumai uba khlaiñ bor u la khynñiuh ha ka por kumba 12:37 jong ka por shathie, ha kaba u la pynkhynñiuh haduh kumba 54 mer ka jingjngai na ka jaka phang pdeng ba u khie.
Ki bor pyniaid ki la maham ba kan don ka atphyllung kaba jur sha ki bynta jong katei ka phang Shathie Alaska bad dewlynnong jong ka Alaska hadien ka jingwan jong utei u jumai.
Wat la katta, la ong ba ki bor pyniaid ka US kim shym la ai jingmaham ia ka jingat-phyllung na ka bynta ki jaka kiba kham jngai na katei ka nongbah.
Ka Alaska ka dei ka bynta jong ka Pacific Ring of Fire, kaba long ka bynta jong ka pyrthei, kaba lah ban ioh khah-khah ia ki jingkhynñiuh jumai.
Kane ka Jylla ba jngai ka la shah ktah ha u jumai uba 9.2 Magnitude ha u Lber 1964, uba jur tam ba ka Shatei America ka la ioh mad ha kine ki hajar snem.
La ong ba utei u jumai u la pynjot ia ka nongbah Anchorage bad u la wanrah ruh ia ka jingat-phyllung kaba jur haduh katta-katta bad kaba la lynshop ia ka Gulf of Alaska, ka rud duriaw Sepngi jong ka US bad kumjuh hapoh Hawaii, ha kaba, palat 250 ngut ki briew ki la khlad ha katei ka jingjia.
La ong ba katei ka nongbah Alaska, ka la shah lynshop teng ha u jumai uba 7.2 Magnitude ha u bnai Naitung 2023, ha kaba ym shym la don kano- kano ka jingjulor kaba jur na utei u jumai uba jur.
