Agartala, Naitung:
Ki pulit jong ka Tripura ki la kem ïa 6 ngut ki briew bad ki la kurup ïa u drok uba shongdor T. 50 lak ha ki ar tylli ki jingkhynra pyrshah ïa ki jingdih pynbuaid ba la pynlong kyrpang hapoh ki 24 kynta Khowai distrik.
Katkum ka jingïathuh jong u Sub-Divisional (SDPO) jong ka Teliamura u Panna Lal Sen, ïa ka jingkhynra kaba nyngkong la pynlong ha ka Naka Checkpoint kaba la buh ha ka thaiñ Mungakami kaba hap hapoh ka Teliamura sub-division. Da kaba pynshong nongrim halor ki jingïohlum jingtip ba la ai lypa, ki pulit ki la pynjur ïa ka jingkhynra ha ka Checkpoint.
“Ha ka por ba la pynlong ïa ka jingkhynra, la pynsangeh ïa kawei ka trok kit jingkit bad la khynra ha ka jingïadon lang ki heh ophisar. Ngi la ïoh kurup haduh 29 tylli ki song kyiad kiba don ka jingkhia ba 209 kilogram, ha kaba ka dor ïew ka la antad ba kan long T.44 lak. Ïa u nongñiah ka kali la tip kyrteng kum u Rajkumar Roy, uba la shah kem ha u SDPO.
Ha kawei pat ka jingjia kaba la jia ha ka miet jong ka sngi Saitjaiñ, la kem ïa phra ngut ki riew shimet kiba na shabar ka jylla hajan ka steshon rel Trishabari, kaba don ruh hapoh ka jingpeit jong ka steshon pulit jong ka Teliamura. Ki pulit ki la ïoh kurup 32 kilo u drok, uba shongdor kumba 2 lak tyngka, na kawei ka kali ha ka por ba ki jurip man ka por.
Napdeng kiba la shah kem ki don saw ngut ki kynthei bad uwei u shynrang bad baroh ki dei ki nongshong shnong jong ka Bhagalpur bad Purnia distrik ha Bihar. Ïa kine la tip kyrteng kum u Ranjit Kumar Sahani (30), ka Ruchi Kumari (20) ka Pinki Devi (25), ka Lakshmi Devi (24), ka Rupa Devi (28).
Ki pulit ki la buh jingthoh ïa ki mukotduma katkum ki kyndon ba ïadei jong ka Narcotic Drugs and Psychotropic Substances (NDPS) Act, bad ka jingtohkit ha kaba ïadei bad ka jingjia ka dang ïaid shakhmat.
