Jerusalem, Naitung:
Katkum ki khubor, la iathuh ba 3 ngut ki la khlad bad 34 ngut ki la mynsaw hadien ba ka Israel ka la leit thombor na suiñ ia ka Damascus bad ka phang Sepngi jong ka Syria ha ka Sngi Balang. Kane ka jingleit thombor jong ka Israel ka long ban ïada ia ki jaitbynriew rit paid Druze, hynrei ka Damascus ka la pynrem ia katei ka jing-leit thombor jong ka Israel bad ong ruh ba ka long tang ka jingleit thombor ban pyni bor bad ka jingpyrshang ruh ban pynjot pynjulor ia katei ka ri.
Ki jinghiar thma jong ka Israel ki thmu ïa ka bynta kaba don ka tnat ïada ri jong ka Syria bad ki jaka ba marjan bad ka ïing syiem jong u President hapdeng jong ka Damascus bad kumjuh ruh ïa ki jaka sah jong ki shipai ha ka nongbah Suwayda. Kitei ki jinghiar thma ki long hadien ki sngi jong ka jing-iaumsnam hapdeng ki jaitbynriew ritpaid Druze trai ri, ki jaitbynriew Bedouin, bad ki shipai Syria ha ka thaiñ Shatei Lam Mihngi. Katei ka jing-leh donbor ka la wanrah ia ka jing-iap jong palat 300 ngut ki briew naduh ka Sngi U Blei.
Ka tnat kam bar ri jong ka Syria ka la kynnoh ba ka Israel ka shu ai daw tang ban ioh ban pynthud ia ka shongsuk- shongsaiñ ha katei ka ri.
