Shillong, Naitung 17
U ‘rangïalehkai ka Shillong Lajong Football Club, Ronney W Kharbudon u la pynïasoh sha ka FC Goa, la pynbna kane ka klob ha ka Sngi Balang.
Kane ka klob ka la pynbna halor ka jingïakhlad lok noh jong saw ngut ki ‘rangïalehkai na Brazil; u Renan Paulino de Souza, Marcos Rudwere Genar Silva, Daniel Goncalves bad u Douglas Tardin.
Ha kajuh ka por ka SLFC ka la ai khublei ïa u Kynsailang Khongsit, uba la leit ïasoh sha ka Rajasthan United FC.
Kumba ka paw, u Ronney dei u ‘rangïalehkai uba la ïoh ban ïalehkai 38 tylli ki jingïakhun ha ka I-League na ka bynta ka Lajong ha ar tylli aïom ba la dep bad une u ‘rangïa-lehkai shadien ba dang 22 snem ka rta u la thep lai kol.
Katba kitei saw ngut ‘rangïalehkai na Brazil ki dei kiba la don bynta ha ki ar snem ba la dep, ha kaba ki la rung sha ka SLFC na ka bynta ka jingwanphai biang jong ki sha ka I-League ha u snem 2023-24 shwa ban pynskhem biang ïa ki na ka bynta u snem 2024-25. Ka Lajong ka la don sa lai ngut kiwei pat ki nongwei kiba pynïasoh bad mih ha kine ki ar tylli ki samoi ïalehkai hynrei kitei saw ngut na Brazil ki la ïai sah haduh kaba kut jong ar tylli ki samoi.
Kumba ka long mynta ka Lajong ka lah ban wanrah ka jingkylla na ka bynta ka aïom ïalehkai 2025-26, ha kaba kan sdang naduh ka Durand Cup mynta u bnai.
