Shillong, Naitung 17
Ha ka khyllipmat kaba pynsngew sarong ïa ka jylla bad ka ri baroh kawei, u Dr. Sajid Nagi, nongïalehkai rah nar (powerlifter) ba paw ka Jylla, u la ïoh ban khur ïa ka takma rupa ha ka Asian Pacific African Classic Powerlifting Championship, kaba la long ha Himeji, Japan naduh ka 6 tarik haduh ka 13 tarik mynta u bnai.
Haba mihkhmat ïa ka ri India ha ka kyrdan Master 3, kane ka jingjop jong u Dr. Nagi ka dei ka jingjop kaba nyngkong eh na ka bynta ka Jylla, namar ym pat don uwei ruh napdeng nongïalehkai na ka jylla ban ïoh takma ha kane ka kyrdan ïakop. Kum ka jingithuh ïa ka jingjop jong u, ka Meghalaya Powerlifting and Fitness Association (MPFA) ka la pynkup burom ïa u ha Umsning. U Dr. Sajid uba sah ha Police Bazar, Shillong, u dei ruh u nonghikai ba la shongthait jong ka St. Edmund College.
