Shillong, Naitung 17
Ka kynhun ki ‘thei ïalehkai U-20 ka ri India ka la lah ban pynliem noh ïa ka Uzbekistan da 4-1 kol ha ka jingïalehkai paralok kaba ar kaba la long ha ka Sngi Palei ha Do’stlik Stadium kaba ha Tashkent.
Ka Sibani Devi Nong-meikapam ka la thep marwei ar kol, katba ïa ki shi kol la thep da ka Sulan-jana Raul bad ka Neha.
Wat lada ki la don ar ngut ki ‘thei ïalehkai ka Jylla hapoh kane ka kynhun ïalehkai ka ri, hynrei ka Fragrancy Riwan ka la long tang marwei ban ïoh mih madan hynñiew minit shwa ban wai ka jingïalehkai ha jaka ka Sulanjana Raul.
Ka Uzbekistan ka la kylliang saw ngut ki ‘thei ïalehkai, katba u coach ka India U-20 u Joakim Alexandersson u la kylliang ar ngut. Ka Juhi Singh ka la mih bujli ïa ka Nishima Kumari ha ka bynta kaba shadien, katba ka Arina Devi Nameirak-pam ha ka bynta shapdeng ka la mih bujli ha ka jaka ka Lhingdeikim.
Ha ka jingïalehkai paralok kaba nyngkong kine ki kynhun ki la ïakhaid mar shi kol.
Haba phai sha kane ka jingïakhun kaba ar, baroh ar ki tylli ki kynhun ki la ïakhaid mar shi kol, ha kaba ka Sibani Devi Nongmeikapam ka la pynkhih jar nyngkong eh ha ka minit kaba 28, hynrei hadien shiteng kynta ka Uzbekistan ka la pynphai kylla lyngba ka Shakhnoza Dekanbaeva (37).
Hadien ba la bteng biang ïa ka kylla miet, ka India ka la ïoh ban thep biang sa ar kol lyngba ka Raul (65) bad ka Neha (71). Ka Nongmeikapam ka la thep biang ïa ka kol ba ar ha ka minit kaba 85 na ka bynta ban pynlong ïa ka India ban ïoh shisyndon ïa ka jingjop.
