Agartala, Naitung:
U Myntri Rangbah jong ka Tripura, u Manik Saha, ha ka Sngi Balang u la sam ïa ka shithi thungkam sha 184 ngut ki Junior Engineer (TES Grade V-B Diploma) kiba dang shu thungkam thymmai ha ka jingïalang kaba la pynlong ha Muktadhara Auditorium.
Ha kane ka jingïalang, u Saha u la pynpaw biang ïa ka jingthmu jong ka sorkar jylla halor ka jingpynroi kaba ïahap bad ka jingpynrung kam kaba shai. U la pynpaw ba la pynlong 19,742 tylli ki jingthungkam ba man ka por, kynthup ïa kito kiba don hapoh ka thup Die-in-harness, ba la pynlong ha ki hynñiew snem ba la leit.
“Ka rukom thung kam jong ngi ka long katkum ka jinglah. Naduh ki jingtei haduh ka pule puthi, ka jingbha jingmiat jong ki riewlum haduh ki jingpyntreikam da ki Digital – ngi trei sha ka jingpynroi kaba pura,” u la ong.
Haba jubab ïa ki jingkynthoh na ka liang pyrshah, u Myntri Rangbah u la ong ba ki jingkynnoh ba ki jingpynrung kam ki long ki bym biang. U la ban jur da kaba ong ba ka sorkar ka shim khia ban ai kam ai jam lyngba ka rukom treikam kaba hok bad kaba ïaid beit ïaid ryntih.
U Saha u la pynpaw ïa ka bynta jong ki Engineer ha kaba pyntreikam ha ka por kaba biang ïa ki projek pynroi paidbah. U la kdew ba ki jingpynrung kam kiba dang ïaid shakhmat bad kiba la thmu ha ka Public Work Department ki long ban pyndap ïa ki jingdonkam jong ka jylla kiba nang kiew ha ki jingdonkam jong ki jingtei.
U la pynshlur ïa ki Engineer ba dang shu thung thymmai ba kin ïaid beit ha ka lynti jong ki jingstad bathymmai, kynthup ïa ka Artificial Intelligence. U la ong ba ka Tripura ka dei ban ïa ryngkat bad ka jingkylla ha ka juk stad saïan jong ka ri hapoh ka jingïalam jong u Myntri Rangbahduh ka ri u Narendra Modi.
U la kdew ruh ïa ka jingkiew ha ka jingwan ki nongjngohkai pyrthei, khamtam ki nongwan jngohkai nabar ri, bad u la ong ba kane ka jinglong ka pyni ïa ka jingjur jong ka jingsngewtynnad ïa ka Tripura kum ka jaka jngohkai pyrthei.
