Shillong, Naitung 17
Uwei u briew nongshong shnong ka Canada, uba la shah kynnoh ba u la tynrah da ka kali SUV ïa u nongmareh marathon uba la rim tam ha ka pyrthei, u Fauja Singh (114 snem), u la shah kem bad yn sa tian bishar ïa u.
Kat kum ki tyllong khubor, la ong ba une u nongshah kynnoh, u la wanphai noh sha la ïing ha Punjab, tang lai taïew.
U Senior Superintendent jong ki pulit jong ka Jalandhar Rural, u Harvinder Singh, ha ka jingïalang bad ki nongthoh khubor, u ïathuh ba u Amritpal Singh Dhillon (26) u la shah kem ha ka miet Sngi Ba-ar, bad la kurup noh ruh ïa ka kali jong u.
U la ong ba ki pulit ki la shim ïa kane ka kam kaba eh bad ban pynbeit hapoh 30 kynta. Hadien katei ka sngi, la wan ïa u Dhillon hakhmat ka ïingbishar jong ka Jalandhar, kaba la set patok na ka bynta ban tohkit ïa u na ka bynta artaïew. La kem ïa u na ïing jong u ha Kartarpur.
Haba jubab ïa ka jingkylli, u SSP u la ïathuh ba ha ka jingtohkit ba nyngkong, ka la paw pyrthei ba u Dhillon u la kyrkieh na ka bynta katto-katne ki kam bad, namar kata, u la ñiah ïa ka kali SUV jong u ha ka jingstet kaba palat, ha kaba u la tynrah ïa u Fauja Singh, 114 snem ka rta.
“Ha katei ka por, um shym la tip ïa ka jinglong jong utei u tymmen uba la shah tynrah ha katei ka kali. U la ïathuh ïa ngi ba u la tieng hadien katei ka jingjia bad dei na kata ka daw ba um shym la pynsangeh ïa ka kali jong u ha katei ka jaka,” la ong u SSP.
Utei u heh pulit u la ïathuh ha ki nongthoh khubor ba u Dhillon u leit sha Jalandhar, hynrei hadien ba la jia ka aksiden, u la wanphai noh sha la ïing da kaba ñiah kali lyngba ki shnong jong katei ka thaiñ.
Hynrei u SSP u la ong ba ka dei ka kamram jong u Dhillon ban pynsangeh ïa katei ka kali ha ka por ba jia katei ka jingjia bad u la dei ban leit rah noh ïa u Fauja Singh sha kawei ka jaka sumar.
La kynnoh ba u Dhillon u la tynrah ïa u Fauja Singh ha ka shnong trai jong une u nongmareh ba la rim eh ha ka Bias kaba ha Jalandhar district jong ka Punjab ha ka por ba u dang ïaid ha ka surok bah Jalandhar-Pathankot. Te kumta u Fauja Singh u la khlad noh namar ka jingmynsaw ha ka janmiet Lah Sngi U Blei.
