Mairang, Naitung 17
Ha ka Sngi Palei ka Hima Nongkhlaw ha ryngkat ka Tirot Sing Syiemlieh Death Anniversary Committee ka la ïoh ban rakhe ïa ka lyngkhuh sngi ïap ba 190 jong u khlawait ka ri u Pa’iem Tirot Sing Syiemlieh ha ka jingïalang ba la pynlong hapoh madan Nongrah Nongkhlaw ha Eastern West Khasi Hills.
Ha katei ka sngi, u Symbud Myntri Rangbah ka Jylla Bah Sniawbhalang Dhar u la long kum u kongsan ha ka jingïadon lang u Bah Paul Lyngdoh, Myntri ka tnat Tourism kum u symbud kongsan, u Chairman ka Meghalaya State Planning Board u Bah Metbah Lyngdoh, ka Director Arts and Culture ka Kong I Majaw, u MDC ka Mairang Bah Equator Nongrang, u MDC ka Mawthadraishan Bah Powell Sohkhlet, ka DC EWKHD ka Kong Anita Kharpor, u SP ka Eastern West Khasi Hills u Bah D Khyriem, u Syiem ka Hima Nongkhlaw u Paiem PM Syiemlieh, kiba la ïoh ruh ban leit buh syntiew ha u motdur jong u Tirot Singh kaba don ha Patriotic Home Nongkhlaw.
U Bah Sniawbhalang Dhar haba kren kum u kongsan u la ong, lada ym don kine ki ‘riewkhraw yn ym long kumne kumba long mynta ha kaba u la kyntu ïa ka pateng kaba mynta ba kin ym dei ban pynlong ïa kane ka sngi tang kum ka jingrakhe, hynrei ban bud ïa ki dienjat jong ki kumno ban buh bynta na bynta ka pateng ban wan.
U la pynpaw ruh ïa ka jingsngew kmen ba ki longshwa ki la buh ïa ka nam ba bha na ka bynta ka pateng kumjuh ruh ban long ka nuksa ïa ka pateng ban wan ha kaba u la ong ruh ban leh ïa kane, kam dei kaba suk hynrei ban pyrshang ban buddien ha ka lynti kaba dei watla kam dei kaba 100 persen hynrei katkum ka mon jong u briew.
Katba u Bah Paul Lyngdoh kum ka dak jong ka jingbuddien ha kaba ïadei bad ka jingplie ïa ka museum, u la pynkynmaw ba ka jingplie ïa ka museum ha katei ka shnong ha u snem ba la dep ka dang donkam shibun ki jingpynbha khamtam ha kaba ïadei bad ka lynti ïaid kjat ban leit sha krem Tirot.
U la ong ba ha u snem ban wan (2026) kan long ka lyngkhuh kaba 200 snem ka jingkiew u Tirot Sing ha ka khet kum u Syiem ka Hima Nongkhlaw. Ban pyntikna ïa ka jingphuh jingphieng jong ka jingrakhe, na ka bynta kane ka prokram u la ong ba ka Sorkar lyngba ka tnat Arts and Culture bad Tourism kin ïaid shakhmat na ka bynta ki jingdonkam ba kyrkieh jong ka Museum bad Krem Tirot ha kaba u la pynbna ban mang pisa sa T.6 klur na ka bynta ki jingtrei kiba dang sah.
U MLA ka Mairang Bah Metbah u la ong ba ki khun samla ka hima ki ban long ka lawei jong ka jaidbynriew, ba ka jingpynïeng tang ïa ki statue ne mot dur, ka jingbuh syntiew man u snem ne ban pynlong ïa ki prokram bapher bapher man u snem kim pat biang pura ha kaba u la ban jur ba lada ki kynmaw ïa u Tirot Sing tang ha ka 17 tarik u Naitung, ka jingrakhe ka la bakla.
Ha katei ka sngi la pynphuh-pynphieng shuh-shuh ïa ka jingïalang da ka jingshad tynrai, ki jingrwai kyrpang bad kiwei-kiwei na ki khun ki hajar ka hima, ryngkat ka jingwan ban sakhi lang da ki paidbah ka thaiñ.
