Shillong, Naitung 17
Ha ka sngi kynmaw burom ïa u ‘riewshlur uba dei u khlawait ka jaidbynriew u Tirot Sing Syiem ha ka jingdap 190 snem ka jingïap jong u, ka Khasi Students’ Union (KSU) ka la dawa na ka Sorkar Jylla bad ki briew kiba don ha ka bor ba kin buh hakhmat eh ban pyntreikam ïa ki aiñ ban ïada ïa ka khyndew ka shyiap bad ki briew jong ka, ym tang ban shu leit khap ribon ha ki prokram jingrakhe.
Ka KSU ka la ther tyngeh ruh ïa ki nongthawaiñ na ka liang synshar bad liang pyrshah na ka bynta ka jingpynlut kai ïa ka por tang ha ki jingkynnoh bad ki jingkynnoh pyrshah ha ka jaka ban ïakren bad ban thaw ïa ki aiñ kiba ai jingmyntoi ïa ki paidbah.
“Ka Sorkar Jylla bad ki briew kiba don ha ka bor kim dei ban pynlut por ha kaba ot ribon hynrei ki dei pynban ban pyntreikam da ki aiñ ban ïada ïa ki trai ri trai muluk bad ïa ka khyndew ka shyiap jong ki,” la ong u nongïalam ka KSU Sengkmie u Bah Lambokstarwell Marngar haba ai jingkren ha ka jingïalang kaba la pynlong hakhmat u mot jong u Tirot Sing Syiem ha madan Iewrynghep ha ka sngi Palei.
“Ki briew ki phah ïa ki nongthaw aiñ sha Secretariat bad Assembly ba kin thaw aiñ na ka bynta ban pynthikna ïa ka jingshngaiñ bad jingïada jong ka khyndew ka shyiap jong ngi bad ki paidbah hynrei kine ki nongthaw aiñ na ka liang synshar bad ka liang pyrshah la ïohi ba ki pynlut kai ïa ka por jong ki ha kaba kynnoh bad pyrshah ïa ki jingkynnoh ha ka jaka ban bunkam ban ïakren bad ban wanrah ïa ki aiñ ka ban ïada ïa ka khyndew ka shyiap bad ki briew jong ngi,” u la ong.
U Bah Marngar u la ong ba ka KSU ka la rah bun ki mat kiba ïadei bad ka jingshngaiñ bad jingïada jong ki trai ri trai muluk. U la pynkynmaw ba bun ki samla ki la shah kem ha u snem 2013 ha ka por jong ka jingïakhih ïa ka mat Inner Line Permit bad ong ba ka jingbym don ka mon saiñ pyrthei na ka liang ka Sorkar ka la pynlong ïa ki briew ban mih sha surok ban pynjur ïa ki jingdawa jong ki.
Une u nongïalam ka KSU u la khot ruh ïa ki samla ba kin shim ïa ka jingkitkhlieh na ka bynta ka bit ka biang jong ka khyndew ka shyiap ka jong ki bad u la ban jur ba kim dei ban shaniah tang ha ki nongmihkhmat ba la jied.
“Nga kwah ban ong katba ngi dang ring mynsiem, ngim dei ban duh jingkyrmen, ngim dei ban shaniah ha kine ki MLA kiba shong ha Secretariat hynrei ngi donkam ban ïeng skhem ha la ka nongrim ban ïada ïa la ka khyndew ka shyiap bad ki briew jong ngi,” u la ong.
Shuh shuh u la pynpaw ïa ka jingsngewkhia halor ki projek lynti rel ba la thmu da kaba kynnoh ïa kito kiba donkti ba ki buh hakhmat eh ïa ka jingmyntoi shimet ban ïa ka jingbha jingmiat jong ki paidbah.
“Haba ngi pyrshang ban wad bniah ïa ka daw kaba don shadien jong kane ka jingthmu ban wanrah ïa ki lynti rel (ha Khasi & Jaiñtia Hills), ngi lap ba ka jingthmu jong ki kam dei ban pynmyntoi ïa ki paidbah hynrei ka dei na ka bynta ka jingmyntoi jong ki hi,” u la ong haba kyntu ïa ki paidbah ba kim dei ban long tang ki nongpeitkai hynrei ban buh jingkitkhlieh ïa kiba don ha ka bor halor ki kam jong ki.
U la kyntu ïa ka imlang sahlang ban long kiba husiar bad ban ithuh ïa ki bor kiba nabar kiba wad ban pynjot ïa ka imlang sahlang jong ki, bunsien ki pynlong ïa lade kum ki nongsngewrit.
U Bah Marngar u la pynpaw ïa ka jingdonkam ban weng ïa ki jingeh ha ka imlang sahlang kum ka jingma jong u drok bad ka jingkiew ki kam tuh ha Shillong, da kaba buh jingkylli balei kine ki jingeh ki ktah ïa ka imlang sahlang jong ki watla ki don ïa ki jinglong tynrai jong ki.
Haba kren ruh shaphang ka jingdonkam jong ka jingïatylli bad ka jinglong skhem ha khmat ki jingeh, u la kyntu ïa ka imlang sahlang ban wad bad weng noh ïa ki “langïong” kiba buh hakhmat eh ïa ka jingmyntoi shimet ban ïa ka jingbha jingmiat jong ka imlang sahlang.
