Jowai, Naitung 17
Nalor ka jingbym ïohlad ban leit rep leit riang sha ki pynthor ki hali kiba don markhap bad ka shnong Tahpat hapoh Assam, ki nongshong shnong ka Lapangap ki la hap mad sa ka jingshah pynthut ha ka jingmaramot surok na ki nongshong shnong ka Langkeroi.
Ki nongshong shnong ka Lapangap ha ka 17 tarik u Naitung ki la ïa mih paidbah ban maramot ïa ka surok khyndew kaba pynïasoh ïa ka shnong Lapangap bad ka shnong Khanduli.
Ki la ïoh ruh ïa kawei ka JCB ne puh shi lum na u MLA ka thaiñ u Bah Sniawbhalang Dhar bad da ka jingshitrhem ki la ïa trei borbah ban suk ka leit ka wan.
Hynrei hadien ka jingshah ujor ha ki Karbi jong ka shnong Langkeroi kaba long ka shnong hapdeng jong ka Lapangap bad Khanduli, ki pulit Assam ki la wan poi ha ka jaka ba dang maramot ha ka por 4:00 baje janmiet bad ki la phah pynsangeh noh ïa katei ka jingmaramot surok.
Haba ïakren bad u Waheh Shnong jong ka Lapangap, Bah Deimonmi Lyngdoh, u la ïathuh ba ka jingmaramot ïa katei ka surok ka long hadien ka jingshna surok ha ka shnong Langkeroi da ka Sorkar Assam bad u la ong ba ka shnong Lapangap kan ïai bteng ïa ka jingmaramot ïa ka surok naduh Lapangap shaduh Khanduli.
Wat lada shah pynsangeh ha ki pulit Assam, hynrei ka jingtrei ban pynbha ïa kane ka surok ka long kaba ïaid beit ïaid ryntih, la ong u Bah Deimonmi bad bynrap ba ki nongshong shnong ki la maramot ïa katei surok da kaba pyndap tang da ka khyndew bad ki maw.
Halor kane ka jingwan pynsangeh da ki pulit Assam, u la ong ba na ka liang ka Dorbar Shnong ka la dep ban pyntip sha ki bor pynïaid District jong ka West Jaiñtia Hills bad na ka liang ka bor District ruh ka la tuklar ban phah ïa u Executive Magistrate ryngkat ki bor pahara ban synran bad ai jingïada ïa ki nongshong shnong katba kim pat dep ka jingmaramot surok.
