Shillong, Naitung 18
Ka Myntri tnad ka rep ka riang jong ka Sorkar Jylla, Dr. Mazel Ampareen Lyngdoh, ka la ong ba ka sorkar mynta ka dang ap ïa ka kaiphod halor ka jingkhlad jong kawei ka heprit ba la tip kyrteng ka Shailynti Marngar, 15 snem ka rta na ka shnong Mawriang Tynnai hadien ba la bam ïa ki jingbam ba la shet khawai ha ïing.
Katei ka heprit ka la khlad noh ha ka step jong ka 14 tarik u Naitung 2025 hadien ba ka la bam ïa ki jingbam ba la shet khawai ha ïing, katba baroh ki hynmen, ki para bad ki kmie ki kpa ruh ki la ïoh pang kynsan.
Haba ïakren bad ki lad pathai khubor mynta ka Sngi Thohdieng ka 18 tarik u Naitung 2025, ka Dr. Ampareen Lyngdoh ka la ïathuh ba ka la bthah ïa ka tnad ka Horticulture bad ka tnad Agriculture ba kin tohkit bad ba kin pynpoi kham kloi ïa ka kaiphod ha ka miej jong ka halor ka jingkhlad jong katei ka heprit.
Ka sorkar ka la ai jinghikai na ka por sha ka por bad ban maham ruh ïa ki nongrep ba kin pyndonkam ïa kita ki jait dawai kiba wanlam ïa kum kine ki jait jingma ha ka imlang-sahlang.
“Bunsien ki nongrep kim sngap ïa ka jingai jinghikai jong ka sorkar bad ki leit bad pyndonkam beit ïa kita ki dawai kat ha la ka mon lajong. Kawei kaba ngin hap ban tip ba haba don kum kine ki dawai ban ïa sait ïa ki khñiang jingpang ha ka mariang, phim lah ban bam ïa kito ki jingbam kiba mih na ka kper kat haduh ban da dap hynñiew lane shiphew sngi, bad ki dei ban sait bha ïa ki jhur bad ki nongrep ki dei ban peit bad khamtam lei-lei ba kam dei ban poi sha ki ïew ki hat, namar ba ïoh ki nongshong shnong kin bam kan wanlam ïa kum kane ka jingjia,” la ong ka Dr. Ampareen.
Kumta ka la kyntu ïa ki nongrep ba kin sngewthuh, ba ka rep ki kwah ban don ka jingïohnong kaba kham heh, hynrei tengkhat haba duna ka jingtip kum kine ki jingjia kin jia bad bunsien haba bam ïa ki jingbam ba la ai dawai kan wanrah ïa ki jingpang kiba bun jait.
Ka Myntri ka la phah ka jingsngewlem sha katei ka longïing kaba la ngat ha kane ka apot jong ka jingkhlad noh katei ka heprit.
Kum ban shu kdew hangne katei ka longïing ha ka 12 tarik u Naitung ka la pynlong ïa ka jingkhawai dap sngikha jong iwei i khun, ha kaba ki la pynlong ïa ka jingkhawai bad ha ka sngi kaba bud pat ka 13 tarik, baroh ki dkhot hapoh jong katei ka ïing ki la ngat bih bad la pynkit noh mar-mar sha Nongum PHC, Kynrud PHC bad Mairang PHC. Baroh shi ïing kiba ngat ha kane ka apot ki la ïoh ka jingsumar bad ki la kham khlaiñ bha mynta, katba ka samla Shailynti pat, namar ba la jur palat ka jingshitom ka la khlad noh.
