Shillong, Naitung 18
U Symbud Myntri Rangbah ka Jylla ba khmih ïa ka tnad kam pohïing, u Bah Prestone Tynsong ha ka Sngi Thohdieng u la ong ba ka Sorkar ka dang pyrkhat ban khmih bniah bad pynkhlaiñ ïa ka ‘Meghalaya Residents Safety and Security Act’ (MRSSA) lane ban wanrah ïa ki aiñ bathymmai ban khang lad ïa ka jingnang kiew haba ïadei bad ka jingwan rung tuh jong ki briew na Bangladesh.
Katkum ka jingong jong u, ka long kaba donkam ban don ïa ka lad treikam kaba kham biang ban shimkhia ïa ki jingeh jong ka jingnang kiew ha ka jingdon ki nongwan rung tuh shapoh ka Jylla.
Haba kren sha ki lad pathai khubor, u Bah Tynsong u la ong ba ka Sorkar ka dang bishar bniah ïa ki lad ki lynti la kan pynkylla ïa ka MRSSA kaba la don lypa ne ban thaw da ka aiñ kaba thymmai ban weng ïa ki jingduna bad ban pynbha ïa ki lad jingïada.
“Ka Sorkar Jylla ka dang pyrkhat halor kane ka phang. Nga hi nga sngew ba ka long kaba kongsan haduh katta-katta bad ngi la donkam kyrkieh ban don kano-kano ka rukom treikam ha ka kyrdan jong ka Jylla,” u la ong.
Ha ryngkat ka khappud kaba jrong 443 km bad ka Bangladesh, u Bah Tynsong u la ong ba ka Jylla ka ïakynduh ïa ki jingeh kiba khraw ban khang lad ïa ka jingwan rung tuh – ha kaba ki ju rung lyngba ki lynti bapher-bapher, kynthup na Kolkata, Rajasthan, bad Bihar.
Ka MRSSA kaba la wanrah ha u snem 2016 ka thmu ban ïada ïa ka jingbit-jingbiang bad jingshngaiñ jong ki nongshong shnong ka Meghalaya da kaba khang lad ïa ka jingrung bad jingsah jong ki bym dei ki trai shnong.
Kane ka aiñ ka la mad ïa ki jingeh ha ka liang ka jingpyntreikam, bad ka jingshah pynïap ba dang shen jong uwei u nongjngohkai pyrthei na Madhya Pradesh ka la pynmih biang ïa ki jingdawa ban pynkhlaiñ ïa kane ka aiñ.
Ka Sorkar ka la pdiang halor ka jingdonkam ïa ka rukom treikam kaba kham khlaiñ ban ïakhun pyrshah ïa ka jingwan rung tuh bad ban pyntikna ïa ka jingshngaiñ jong ki nongshong shnong bad ki nongwan jngohkai pyrthei.
Na ka liang u Bah Tynsong u la pynpaw ba um don ïa ki jingkheiñ kiba tikna haba ïadei bad ki nongwan rung tuh. Hynrei u la kular ba ka Sorkar ka dang trei ban pynkhlaiñ ïa ki jingpyrshang jong ka ban ïada kumjuh ban lap ïa ki jingwan rung tuh, ha kaba ki BSF bad ki pulit ka Jylla ki don ka bynta kaba kongsan ha kane ka liang.
