Shillong, Naitung 18
Ha ka nohphai sngi jong ka 18 tarik u Naitung 2025, u trai jong kawei ka dukan ha Polo u la lap ïa kawei ka pla rong ïong kaba don hakhmat dukan jong u.
Une u trai dukan u la pyntip sha ki pulit pynïaid kali kiba don ha katei ka jaka bad ki pulit (pynïaid kali) pat ki la pyntip sha ki pulit kiba dei peit.
Hadien ba ki pulit ha ryngkat bad ka kynhun Bomb Squad mar shu ïoh jingtip ïa kane ka jingjia ki la kerkut ïa ka thaiñ Polo ban pynlong ka jingtohkit bad hadien ba ki bor pulit ki dang pynlong ka jingpeit bniah bad khwai ïa katei ka pla la wan uwei u samla ba kyrteng Nijimu Fithu (24 Snem) na ka shnong Kenuozou Colony Kohima Sadar, District, Nagaland ban wan kam trai ïa katei ka pla.
Ki bor pulit nyngkong ki la suba ba ka dei ka pla ba don ïa u bomb bad ki la pyntip pat sha ki pulit ka Anti-Narcotics Task Force (ANTF) ban phah peit bniah. Hynrei, hadien pat ba la dep peit bniah bha ïa katei ka pla la lap pynban da ki jingdih pynbuaid kum Ganja, ryngkat bad ki jaiñ phong ba dang thymmai nalor kiwei-kiwei de ki tiar.
Ïa une ganja, une u briew u la sop bha da ki plastik ban ym ithuh bad la thep hapoh ka pla, bad hadien kane ki pulit ki la ot ïa kitei ki plastik.
La sakhi ruh, ba baroh u ganja ba la kit da utei u briew hapoh katei ka pla u la song bha haduh 5 tylli ki song kiba heh bad 2 tylli pat ki song rit.
Lah ban kdew hangne ba utei u briew uba la song bha ïa kitei ki jingdih pynbuaid (ganja) bad thep hapoh pla u la thmu ban shalan shawei.
Haba thew ïa ka jingkhia jong kitei ki jingdih pynbuaid, uwei-pa-uwei u ganja u don ka jingkhia 1.042 kilo, 1.024 kilo, 1.026 kilo, 1.060 kilo, 1.072 kilo, 0.196 kram, 0.176 kram, 0.162 kram, 0.036 kram.
Hadien ba la dep ban thew ïa kitei ganja na ka liang Pulit ka Anti-Narcotics Task Force (ANTF) ki la thep biang ïa u (ganja) hapoh ka synduk.
