Shillong, Naitung 18
Ki pulit ka North Garo Hills ki la ïoh ban kurup ïa kawei ka arshaka kaba la shah tuh kaba don ïa u registration number ML13-A-3853 na Meatagittim, Baghmara ha South Garo Hills. Kane ka jinglap biang ïa ka arshaka ka dei hadien bad ka ejahar ba la mudui ha thanat Resubelpara.
Ka arshaka ba la ïoh kurup ka dei kaba la ithuh na ka Engine No. AK3DN2X13413 bad ka Chassis No. MD626AK30N2D13478 bad la wad bniah katkum ki jingtip ba la ai da u nongshah kynnoh uba la shah kem, u Arjun S Marak uba la tip ruh kum u Jaksi lane u Kugra (32 snem).
Ka jingtohkit kaba bniah ka dang ïaid shakhmat ban lap la une u nongshah kynnoh u donkti ne em ha kiwei pat ki kam kiba kum kine ha kane ka thaiñ.
