Williamnagar, Naitung 18
Kawei ka longkmie na Amindagre kaba hap hapoh ka Gambegre konstitwensi ka la jah rngai bad la suba ba ka la kynthih na ka jingkieng ha ka miet jong ka 17 tarik u Naitung 2025, namar ki daw jong ka jingïadei samla.
Katei ka longkmie, 24 snem ka rta, kaba la tip kyrteng kum ka Chenorisha A. Sangma, ka dei kaba sah bad ka kmie lajong ha Williamnagar Fishery Colony kumba shibnai eiei. Ka kmie jong ka, ka la sah ha katei ka Colony la jan 11 snem.
La ïathuh ba ha ka por kumba 12:33 baje eiei mynstep, ka Chenorisa, ka la phah ïa ka khubor khadduh sha ki bahaïing jong ka, da kaba thoh “angade siaignok” kaba mut ”Ngan sa ïap”. Ka kmie jong ka ka la pyrshang ban phone mardor hynrei kam shym la ïoh jubab eiei. Hynrei haba kawei ka paramarjan ka la lah ïoh ka lad ban phone ïa ka Cheno-risha, ka Chenorisha ka la jubab bad ong ba kan sa pynkut noh ïa la ka jingim wat la kam shym la pynpaw ïa ka jaka kaba thikna jong ka hynrei ka la ai dak ba ka don ha kawei ka jingkieng.
Da ka jingkhuslai, ka kmie jong ka Chenorisha ka la leit bran-bran sha Thanat Williamnagar bad ujor ïa ka kaiphod ba jah briew ha ka por kumba 1:50 mynstep. Ki pulit ki la sdang mar-mar ïa ka jingleit wad ïa ka Chenorisha bad ki la poi ha Nokgil Aowe Hanging Bridge ha ka por kumba 2:00 mynstep.
Wat lada ym shym la lap satia ïa ka Chenorisha, hynrei na katei ka jingkieng la ïoh kurup ïa ka pla, ki sandal bad ka mobile phone jong ka, kaba la wanrah ka jingsuba kaba jur ba ka la pynïap ïalade.
Ki tyllong khubor kiba ïa jan bad katei ka longïing, ki ïathuh ba ka Chenorisha, ka la don ka jingïadei bad uwei u briew uba la shong kurim na Daren Aogal, Tura, naduh u bnai Ïaïong mynta u snem.
La pyntip ruh ba ka longïing jong ka Chenorisha ryngkat bad ki dkhot jong ka mahari, ki la pynlong ïa ki jingïalang bunsien ban pynsngewthuh ïa ka ba ka dei ban pynkut noh ïa katei ka jingïadei bad utei u briew, da kaba ong ba kam long kaba dei. Wat hapdeng ki jingïakren kiba bunsien, ka Chenorisha ka la kyntait ban pynkut noh ïa ka jingïadei bad la ïathuh ba ka la pyrshang ban pynïap ïalade ha kiba bun ki khep.
Ka longïing ka kynnoh ba ka jingïadonkti jong u shynrang uba la shongkurim ka la don bynta shibun ha ka jingsngewsih jong ka. Na ka liang ki bahaïing ki la thmu ban ujor ejahar pyrshah ïa u, da kaba buh jingkitkhlieh ïa u ban pynlong ïa ka Chenorisha ban poi sha kane ka jingpynkut jong ka ïa ka jingim lade bad ka jingjia ba sngewsih.
Kumba ka long mynta ka jingkhynra bad jingpyllait im ka dang ïaid shakhmat ha ka wah Simsang hajan ka Nokgil Aowe Hanging Bridge.
