Khliehriat, Naitung 18
Ka Youngstar SCC Huroi bad Narwan SC ki la buh jaka ïalade sha ka quarter final jong ka lympung ïalehkai 3rd Division Football League ba la pynïaid da ka East Jaiñtia Hills District Football Association (EJHDFA).
Kane ka la wan urlong hadien ba ka Youngstar SCC Huroi bad Narwan SC ki la ïoh jingjop ha ka jingïalehkai round-16 kaba la long ha madan artificial turf Diengshynrum, Khliehriat ha ka 18 tarik Naitung.
Ka Youngstar SCC Huroi ka la rai ïa ka nam jop lyngba ka jingïashut tie breaker da 4-2 kol hadien ba ka jingïalehkai ha ka por ba la buh ka la kut da ka jingïakhaid mar 1-1 kol pyrshah ïa ka Tuberkmai Shnong SC.
Ïa ka kol jong ka Youngstar SCC Huroi la thep da u Wallamborlang Lamin Gadew (30), katba ïa ka kol jong ka Tuberkmai Shnong SC la thep da u Ribait Bang (77).
Ha ka jingïalehkai kaba bud, ka Narwan SC ka la pynliem ïa ka Tongseng YSC da 2-1 kol. Ïa ki kol jong ka Narwan SC la thep da u Miki Suiam (18) bad Thomas Langstang (72), katba ïa ka Tongseng YSC la thep da u Deibormi Shadap OG (70).
Ha ka 19 tarik u Naitung ka jingïalehkai kan long hapdeng ka Moolang SC bad Umrasiang United SC ha ka por 12:15 baje mynsngi, ka Suchen Lumiarain bad Rymbai Pohskur SC ha ka por 3.00 baje nohphai sngi.
