Man u briew ngi donkam ka jingshngain bad ka jingsuk (Peace) ha ka jingim kaba man la ka sngi. Khlem kine ar tylli ka jingim ka shongsyier bad kam suk ka mynsiem. Haba ngi leit shano-shano ngi donkam ïa ka jingsuk bad ka jingshngaiñ na ki por baroh. Haba shngaiñ ka mynsiem bad ka pyrkhat ka pyrdaiñ ruh ka sngewsuk.
Haba shngaiñ ka mynsiem ka kmen ka wan ha ka jingim. Ha bym don ka jingshngaiñ (Security) ka jingim jongngi ki briew ka dap da ka jingsheptieng.
Kum ki briew ngi dei ban long kiba donakor don burom bad im tip briew tip blei ban ïoh ka jingim kylluid khlem ka jingshah teh shah khum hano hano ruh. Haba shngaiñ ka don ka jingkmen ha ka mynsiem. Kumjuh ha ka ri bad ka jaitbynriew ka kmen ka sngewsuk haba don ka jingshngaiñ bad ka jingsuk.
Ha bym don ka jingshngaiñ bad ka jingsuk ka ri bad ka jaitbynriew kam kiew. Haba ngi shong ngi sah hangno hangno ruh ngi donkam ïa ka jingshngaiñ bad ka jingsuk. Ka ri kaba don ka shongsuk ka shongshngaiñ ka roi ka par ha kiba bun ki liang.
Haba don ka shongsuk shongshngaiñ bad ka jing-shngaiñ ka jaitbynriew ka khie ka san bad ka kiew shaphrang ha ka imlang ka sahlang. To ai ba ka jing-shngaiñ bad ka jingsuk kan don hapoh ïing hapoh sem ha ki shnong ki thaw bad ha ka ri bad ka jaitbynriew salonsar.
C. B. Iawphniaw
