Imphal, Naitung:
Ki bor pahara ha Manipur ki la kem ïa ar ngut ki lehnoh kiba trei radbah na ki seng ba la shah ñiew beaiñ, ha kaba ïadei bad ka jingdonkti jong ki ha ki kam dawa pisa kiba la buh jingsyier jingtieng bad ktah jur ïa ki kam khaïi bad ki nongkamai pisa ne nongkhaïi ha kylleng ka jylla.
Na ka jingpyntreikam kaba khlem shongthait, ka kynhun jong ki shipai pahara ha ka 17 tarik Naitung, ka la ïoh kem ïa u Thokchom Yoihenba Singh ba la tip ruh da ka kyrteng kum u Wangba bad u Lion na Thinungei Mamang Paton ha Bishnupur distrik. Une u lehnoh uba la 21 snem ka rta u dei na ka kynhun People’s Revolutionary Party of Kangleipak (PREPAK).
U Singh u la pyndep ia ka jinghikai shipai kaba 30 sngi ha Kakching Khunou shwa ba un sdang ia ka kam dawa pisa jong u. Ki thong jong u ki kynthup ia ki skul, ki dukan die dawai, ki ophis sorkar, ki doktor, bad ki engineer kiba treikam ha ka distrik Bishnupur bad ki thain Imphal. Shisngi shwa kane, kata ha ka 16 tarik, Naitung, ki pulit ka Manipur ki la ïohkem ïa u Sorokhaibam Pari Singh ba la tip ruh kum u Ibungo. Une uba la shahkem u dei u dkhot jong ka kynhun National Revolutionary Front of Manipur (NRFM).
Ki pulit ki la ïoh ban kurup ïa ka Mobile Phone bad ka bek pisa na u ha ka por ba u la shahkem.
