Shillong, Naitung 18
U Superintendent of Police, East Khasi Hills, Shillong, u la ïathuh ba la ïoh jingtip ïa ka jingïaid ki kali heh ba kynthup ia ki Bos Night Super kiba wan na Diengpasoh ban rung sha Shillong lyngba ka surok Macabe kaba don ha Demseiniong. Kane ka la wanrah ïa ka jingjulor ka surok bad ki waiar kiba pynpur najrong, ka wanrah jingma ïa ki iing ki sem kiba don mar syndah bad ka surok bad pynthud ruh ïa ka ïaid ka ïeng ki kali.
Kumta, kum ka jingpynbud ïa ka hukum hapoh ka Section 163 BNSS ba la pynbna da ka Deputy Commissioner East Khasi Hills District, Shillong bad ban tehlakam ïa kino kino ki jingjulor, ban wanrah ka jingshngain ia ki jingdon jingem bad nongshnong shnong jong ka thaiñ hi baroh kawei, la mana ïa kino kino ki kali heh (Heavy Motor Vehicles lane HMV) kynthup ïa ki Bos Night Super ban ïaid lyngba ka shnong Demseiniong (Macabe Road). Yn shah ïa baroh ki kali heh (HMV) bad ki bos Night Super ban ïaid tang haduh Ishyrwat naduh 9 baje mynmiet haduh 6 baje mynstep jong ka sngi kaba bud bad kumta, yn ym shah ïa kino kino ki kali heh ban ïaid sha Demseiniong.
