Shillong, Naitung 18
Ka All India Football Federation (AIFF) bad ka Football Sports Develop-ment Limited (FSDL) kiba dei ki paralok ba ïadei bad ka jingïaid ïew jong ka Indian Super League (ISL) ki don ha ka jingeh halor ka jingïateh soskular ba thymmai jong ka Master Rights Agree-ment (MRA) kaba 15 snem. Ka jingïateh kaba mynta kan kut ha ka 8 tarik u Nohprah.
Ka AIFF ka la tyrwa ban pynjari 10 snem ïa ka FSDL ban pynïaid ïa ka ISL, da ka jingkular kaba duna tam kaba long K50 klur, kaba kiew da 5% man la u snem. Ka AIFF kan bat ïa baroh ki hok ki bym dei jong ka ISL, kynthup ïa ka kynhun ïalehkai ka ri bad ki jingïakop.
Ka FSDL ka ai jingmut ban thaw ïa ka kompeni thymmai ban synshar, pynïaid, bad pynïaid ïew ïa ka ISL, da ki klob, ka AIFF, bad ka FSDL kum ki nongïoh bynta. Kane ka rukom ka thmu ban weng ïa ki jingeh ha ka jingtei bad ban pynthikna ïa ka jinglong shngaiñ ha ka por kaba jlan.
Ka FSDL ka la bei tyngka palat K5,000 klur ha kaba pynbiang ïa ka ISL khlem da ïoh myntoi pisa biang bad ka wad ïa ka rukom treikam kaba bniah bha ha ka rukom pynbeit bad jingsynshar ïa kane ka league.
Ka jingïakren hapdeng ka AIFF bad ka FSDL ka long kaba kongsan bha na ka bynta ka lawei jong ka phutbol ha India, khamtam eh ïa ka ISL. Ka jingwad ïa ka jingïateh kaba myntoi lang kan long u shabi ban pynbeit ïa shibun ki jingeh.
