Shillong, Naitung 18
U samla Enlang Sawian, nongïasaid aiñ jong ka jylla haba buddien ïa ka jingujor kaba u la buh da ka jingthoh sa sha ka shlem treikam jong ka National Commission for Schedule Tribe (NCST) kaba dei ka shlem treikam ban peit tang na ka bynta ki riewlum pyrshah ïa u Sushil Guru uba la kam ïalade kum u pandit bad ïa u Youtuber Raghav Sharma uba la pyllait ïa katei ka durkhih khlem da wad bniah ïa ki jingkren, ha kaba utei u pandit u la kynnoh ba ka Meghalaya ka dei ka jylla kñia briew bad bam briew.
Kumta, u samla Enlang Sawian ha ka Sngi Thohdieng ka 18 tarik u Naitung 2025, u la ïathuh ba ka National Commission for Schedule Delhi ka la shimkhia bad la pynrung mukotduma ïa kitei ar ngut.
Haba ïakren bad U Nongsaiñ Hima, u samla Enlang u la ïathuh ba u khlem poi pyrkhat ba ka National Commission kan pynsted ban pynrung mukotduma, namar ba katkum ka jingïakren ha ka sngi buh jingujor u la ïoh ka jubab ba kan shim por.
Shuh shuh, u la ong ba ïa mynta ka National Commission ka dang pynlong ïa ka jingtohkit ïa kine ar ngut bad um pat ïoh jingtip ba ki dei ki briew na kaei ka jaka, hynrei kine ki briew ki dei ban ïoh ïa ka jingpynsaja kaba tyngeh. U la ïathuh ruh kat haduh mynta ïa ka ejahar kaba u la buh sha Thanat Lumdiengjri mynta ki dang pynlong ka jingtohkit sha Thanat Sadar bad haduh mynta um pat ïoh jubab eiei, hynrei u la kyrmen ba kan shim khia halor kane ka kam.
