Itanagar, Naitung:
Ki la don kumba 66 tylli ki shnong kiba don harud khappud Indo-Myanmar ha Arunachal Pradesh ïa kiba la ithuh ba ki la roi hapoh ka jingtreikam ka Centre’s Vibrant Villages Programme (VVP), la pyntip u Myntri Rangbah ka jylla u Pema Khandu. Kine ki shnong ki hap hapoh ka Tirap, Changlang bad Longding distrik jong ka jylla khappud, ong u Khandu ha ka jingthoh ba la phah ha ka Social Media. U la ong katba 42 tylli ki shnong ki don ha Changlang distrik, 13 tylli ki don ha Longding distrik bad 11 tylli ha ka Tirap distrik.
Da kaba khot ïa kane ka jingthmu kum ka ‘jingïaid lynti ha ka kam pynroi kaba khatduh’, u Khandu u la thoh ba yn pynleit jingmut ha ki surok, ka telecom, ka bording, ki lad kamai bad ka jingkyntiew ïa ka sap.
Ha ka bynta ba nyngkong jong ka Vibrant Village Programme, ka sorkar pdeng ka la mynjur haduh 455 tylli ki shnong kiba don ha khappud Indo-Bhutan bad Indo-Tibet ha ka 15 tarik u Rymphang, 2023. Na kine, ki la don 135 tylli ki shnong ki bym pat shah pynïasoh.
