Shillong, Naitung 18
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong, ha ka Sngi Thohdieng u la ban biang halor ka rai jong ka Sorkar Jylla ban kyrpad ïa ka Sorkar Assam na bynta ban pynphai biang ïa ka Block I bad II sha ka Jylla.
U Bah Tynsong uba dei ruh u Chairman ka Regional Committee u dang ap ïa ka jubab na ka Assam ban buh por na bynta ka jingleit jurip kaba na baroh arliang.
Haba kren sha ki lad pathai khubor, u Symbud Myntri Rangbah u la pynpaw ïa ka jingangnud ban pynlong ïa ka jingjurip na baroh arliang ha kano-kano ka por, la kumno-kumno hadien ka aïom slap.
“Ngam pat ïoh ïa ka tarik na shatai shiliang namar ha Ri-Bhoi ngi don ar-lai ngut ki Chairman na ka liang ka Assam katba na kane ka liang, dei tang ma nga. Kumta nga dang ap ïa ka tarik na ki. Ha kajuh ka por, ka ilekshon jong ki kan long ha u snem ban wan, ngam tip la kin lah ne em ban pyllait por na bynta ka jingjurip na baroh arliang bad nga dang ïai ap ïa ka jubab na ki,” u la ong.
“Na ka liang jong ngi, ngi la pynkhreh. Ha ka jingshisha, ngi la kwah ba ka jingjurip kan long ha kano-kano ka por ha kano-kano ka khyllipmat. Hooid ha ka por slap ngin don jingeh khyndiat hynrei ka lah ban long ha kaba kut jong u Nailur bad shisien ba la kut ka aïom slap, nga pyrkhat ba ngi kwah ba wat na ka liang ka Assam ruh kin long kiba la khreh haba ïadei bad ka jingjurip jong baroh ar tylli ki komiti,” u la bynrap.
Haba kylli, u Bah Tynsong u la kdew ïa ka jingpynbna jong u snem 1950, ha kaba la kdew ïa ka jingpynkynriah jong katto-katne ki jaka na Meghalaya sha Karbi Anglong. U la pynpaw ba ka jingeh kaba mynta ka tawiar sawdong ban pynphai biang ïa ka Block I bad II sha Meghalaya.
“…na ka liang ka Sorkar, kaei kaba ngi kwah ka long tang ban kyrpad ïa ka Sorkar Assam ban pynphai biang sha Meghalaya. Nga tharai ba kata ka dei ka mat kaba kongsan ha kaba ngi ïakren.”
Hynrei u Bah Tynsong u la ban jur halor ka jingdonkam na baroh arliang mamla ban pynneh ïa ka ‘status quo’ bad ban wanrah ïa ka jinglong-jingman kaba biang ha ka ban pynbeit ïa ka jingïakajia pud.
U la kyrpad ruh ïa ki shnong kiba ïadon bynta na baroh arliang ban pynneh-pynsah ïa ka shongsuk shongsaiñ, da kaba pynpaw ba ka jingïakajia pud ka la neh la bun pateng mynta.
Katkum ka jingong jong u, ïa kane ka kam lah ban pynbeit lyngba ka jingjurip lang bad ka jingïakren hapdeng ki komiti ba la ïalam da ki Myntri Rangbah jong baroh ar tylli ki Jylla.
“Kane ka jingeh kan ïai bteng tad haduh bad lymda ki komiti kin ïashong bad ïakren halor kine ki mat baroh hynrei ka jingkyrpad jong nga ïa baroh arliang, la ka long ïa ka Assam ne Meghalaya ban ai ngin pynneh ïa ka ‘status quo’,” u la ong.
Shuh shuh u la bynrap, “Nga kyrpad ïa baroh ki shnong kiba ïadon bynta na baroh arliang ban wanrah ïa ka jinglong-jingman kaba bit-biang namar kane kam dei ka kam ka bathymmai bad ki la ïadon lang na kawei ka pateng sha kawei pat. Nga kyrpad ban wanrah ïa ka jinglong-jingman kaba bit-biang khnang ba ki jingïapher ki bym donkam kiba jia na ka por sha ka por ki dei ban sangeh noh,” u la pynpaw.
