Shillong, Naitung 18
U Myntri Sorkar Jylla, Bah Paul Lyngdoh u la pyllait paidbah ïa ki sopti ïalehkai (Jersey) jong ka club ha kane ka samoi ïalehkai Shillong Premiere League 2025-2026, hynnin ka Sngi Palei 17 tarik u Naitung. Kiba la ïadon ryngkat lang ha kane ka sngi ki kynthup ïa u MLA Bah Banteidor Lyngdoh uba dei ruh President jong ka Shillong Sport Association (SSA), Dorbar Shnong Jaïaw Langsning, ki Seng Samla, ki rangïalehkai ka Langsning FC, Coach ka Langsning FC, bad ki paidbah nongshong shnong ka Jaïaw Langsning bad kumjuh u President bad Secretary ka Shillong Sports Association.
Ha kane ka sngi la ïoh ban batai lyngkot shaphang ka jingïaid lynti jong ka Seng Samla Langsning da u Secretary ka Seng Samla Shnong. Ka la don ruh ka jingsam ïa ki tracksuit sha baroh ki rangïalehkai bad ki coaching staff jong ka Langsning FC.
Haba kren ha kane ka sngi na ka liang u Myntri ka Sorkar Jylla, Bah Paul Lyngdoh, u la ong long shlur ban phohsniew, tangba ka jingphohsniew kam dei ban long kumjuh, ngi dei ban rah shakhmat ïa ka thong jong ka jingphohsniew bad donkam ban buh sa ki mawnongrim ban pynshong ïa kita ki jingphohsniew.
Shuh-shuh u la ong, kaba kham kongsan eh ka dei lai tylli kiei-kiei kiba donkam, kaba nyngkong ka dei ka team work, bad kam don kano-kano ka football club kaba ong ngi don ïa u superstar, bad ïa 10 ngut kiwei ki player ngim donkam ïa ki. Kaba ar dei ban don ïa ka goal, ngi lah ban mareh sharum bad shaneng jong ka madan football, hynrei lada ym don ïa ki Goal Post ngin pynsepei ïa ka bor kum ki player, namar ka jingjop ka dei ba ngi thep sha Goal. Kaba lai ka dei ha ka kynhun jong 11 ngut ki player, uwei-pa-uwei u player u don la kajong-kajong ka thong bad la ka jong ka Position, bad lada u nongap kol u kwah thep kol bad u player shakhmat u kwah kem bol kata hap ban pyrkhat ka jingïalehkai kaba kumno.
Khatduh u la bynrap baroh kiba don hangne ka dei kawei ka kynhun bad ngi don la i bynta ban pyndep bad nangne shakhmat ki rangïalehkai naduh u coach ki dei ban don ïa ka jingmut ban pynrung ïa kine lai tylli kiba kham kongsan kum ka kynhun ha ka jingïalehkai football.
