Guwahati, Naitung:
Ha ka bynta kaba kongsan jong ka jingthmu ban kyntiew ïa ka kam saiñ hima-sima ha Assam, katto-katne ngut ki ‘riew pawkhmat na ki jaitbynriew bapher-bapher, kynthup ïa u heh nongïalam barim jong ka kynhun lehnoh ba la shah ñiew beaiñ ka ULFA (Independent), ki heh nongïasaid aiñ bad ki nongïalam barim jong kiwei pat ki seng saiñpyrthei – ki la pynïasoh pura bad ka seng kaba bat ïa ka jingsynshar ha ka jylla ka Bharatiya Janata Party (BJP) ha ka sngi Palei.
Ïa kane ka jingpynrung dkhot la pynlong ha ophis treikam jong ka seng ha Guwahati, ha kaba u President ka BJP ha Assam u Dilip Saikia u la pdiang sngewbha ïa ki dkhot bathymmai ha ka jingïadon lang u In-charge ka BJP ha Assam u Harish Dwivedi bad u Organization General Secretary u GR Ravindra Raju.
Uwei na kiba la shah pynrung kyrteng u dei u Dristi Rajkhowa uba la tip ruh kum u Manoj Rabha, uba la kam ïalade ba u dei u Deputy Commander barim jong ka kynhun lehnoh ULFA (I) bad uba tbit bha ha ki kam pynbthei bom.
U Rajkhowa u la pyndem noh ha ki kti jong ka aiñ ha u snem 2020 hadien ki phew snem ba u la don ha ka kynhun lehnoh, shisien u la treikam kum u nongïarap ba shaniah jong u heh ka kynhun ULFA (I) u Paresh Barua.
Kiwei pat kiba la rung dkhot hapoh ka seng BJP ki kynthup ïa u Manas Sarania, u heh nongïasaid aiñ, u Manoj Dhanowar, u President barim jong ka seng Aam Aadmi Party (AAP) ha ka jylla, u Arjun Chettri uba dei u Vice President ka Assam Gorkha Sammelan bad u President barim jong ka All Assam Gorkha Students’ Union; u Nirmal Payeng, u General Secretary barim jong ka kynhun ki samla jong ka Raijor Dal; bad u Amal Patowary uba dei u Secretary barim jong ka Central Committee jong ka Asom Gana Parishad (AGP).
