Jowai, Naitung 18
Ka Dorbar Shnong Lapangap, West Jaintia Hills District ka la shim ïa ka rai ban pynsangeh noh shipor ïa ka jingmaramot ïa ka surok khyndew kaba 10 km na Lapangap sha Khanduli.
Ïa katei ka rai la shim hadien ka jingïakren lyngba ka phone hapdeng u Waheh Shnong jong ka Lapangap u Bah Deimonmi Lyngdoh bad u Border Magistrate u Bah GH Passah ha ka 18 tarik Naitung.
U Bah Passah u la ïathuh ïa u Bah Lyngdoh ba katei ka kam maramot surok bad kiwei kiwei de ka la poi sha ka skhor jong ki heh ki hain jong ka sorkar bad ka sorkar ka la shim ïa ka rai ban pynlong ïa ka jingkren bad ka sorkar Assam ha kine ki sngi ki ban sa wan kumta kan bha ban sangeh noh shwa, ïa ka jingmaramot surok.
Ha kawei pat ka liang, ki nongshong shnong ka Lapangap ki la ïa mih paidbah ban bteng biang ïa ka jingmaramot surok ha ka 18 tarik Naitung.
Katba ka jingmaramot da ki bor briew bad ka jingïarap jong ka JCB ka dang ïaid shait shait la poi biang ki pulit Assam kiba la bthah ïa ki ban sangeh ka jingmaramot ïa katei ka surok.
U heh pulit jong ka Assam u la mynjur ban shah ban bteng ka jingmaramot surok hadien ka jingïakren bad ki Waheh ka Shnong Lapangap hynrei khlem da pyndonkam ïa ka puh shi lum.
