Shillong, Naitung 18
Ki nongshong shnong na Nongjrong kaba hap ha Jongksha PHC ha ka Sngi Thohdieng ka 18 tarik u Naitung 2025 ki la leit ban ïakynduh ïa ka Myntri ka tnat ka koit ka khiah jong ka Sorkar Jylla, ka Dr. Mazel Ampareen Lyngdoh ban pyrshah ïa ka jingpynkynriah kam ïa ki ar ngut doktor kiba peit ha Jongksha PHC.
Haba kren sha ki lad pathai khubor ki nongshong shnong ki la ïathuh ba ka jingpyrshah jong ki ïa kane ka jingpynkynriah kam ïa kine ar ngut ki doktor ka dei, namar ka jingroi bad jingkiew bad ki jingkylla kiba ki la ïohi ha Jongksha PHC bad kumjuh ha ki sub-centre ba hap ha Jongksha PHC naduh ba wan ma ki.
“Ngi ïohi da la ki jong ki khmat ba shibun ki kam ba i Dr A.K. Nongbri i la trei ban pynbit pynbiang ïa ka koit ka khiah ha ki thaiñ Jongksha. Ki nongthiah pang bad nongshim dawai ruh kim dei eh tang kiba hap ha Jongksha, hynrei ki dei ruh na kiwei ki PHC” ki la ong.
Ki la ong ruh ba ka jingpynriah ïa ki ar ngut doktor ka ktah bha ïa ki nongshong shnong jong kane ka thaiñ, namar ka Jongksha PHC ka hap ban peit haduh 40 tam ki shnong, bad ka jingduh jingmyntoi kan dei ïa u babun-balang.
“Mynta ngi ïohi ruh ba shibun ki jingshna jingtei kiba la pynkhreh ha Jongksha PHC ki bym pat lah ban pyndep, na ka liang jong ngi ki nongshong shnong kiba hap ha Jongksha PHC ngi kwah ba ka sorkar kan da peit bad bishar bniah bha shwa bad ai lad ba kine ki doktor kin pyndep ïa kine ki kam ba ki trei khnang ba kan bit kan biang ïa ki nongshong shnong,” ki la bynrap.
Namar kata, ki la dawa ruh ba ka sorkar ka dei ban peit bad khmih thuh bha bad ka dei ban ai lad ïa kine ki doktor ba kin trei ban kyntiew ïa ka koit ka khiah. Da kaba pyrshah jur ïa kane ka jingpynriah khlem nongrim, lada dei ka jingpynkriah na ka daw ba i shah kyntiew kyrdan ngi kmen, hynrei ban shu pynkynriah khlem nongrim ngim lah ban pdiang.
