Shillong, Naitung 18
Ki trai ïing ki la kyrpad ïa ki bor ba dei peit ïa ka Tripura Castle kiba dang shna ïa ka surok ba kin ïarap haba ki nongshong wai kiba la shah ktah na ka jingsahkut ka nala kaba wan najrong.
Kumta, ki trai ïing ki la kyrpad ïa ki trai jong ka Tripura Castle ban ai jingïarap ïa kito ki nongshong wai kiba ka pla pisa ba mut siew bai wai ïing ka la shah rong ha ka um bad don kiba shong wai kiba ju saitjaiñ nong ki la sngewsih namar ka um ka la rong lut.
Ka jingshna surok ka Heritage Club, Tripura Castle Hotel, Shillong kaba don ha Cleve Colony ka la buh jingma ïa ki longïing kiba sah ha Malki Wahkdait, namar ha ka 17 tarik mynta u bnai haba ther u slap, ka um kaba la kit ïa ki maw, ka khyndew bad ki jaboh-jabaiñ ka la rung beit sha ïing briew namar ba la dap ka nala.
Kine ki jaboh-jabaiñ kiba la tuid sha ïing briew ka la jia ha ka por 3:00 baje nohphai sngi ha ka por ba ther jur u slap. Pynban namar ba ka nala ka dei kaba rit haba ka um ka la kit ïa ki maw, ki shyiap bad ki jaboh-jabaiñ ka la poi shaduh phyllaw bad rung shapoh ïing briew haduh ba kim lah shuh ban shong ban sah namar ka jingsma.
Haba ïakren bad u Bah Marcel Lyngdoh uba dei trai ïing, u la ïathuh ba namar ba u trai ka Heritage Club, Tripura Castle Hotel u dang shna surok ha jaka lajong hynrei u set ïa ka um kaba dei ban tuid sha Wahkdait bad kumta haba u slap u la wan hap mynhynnin ka sngi (Sngi Palei) ka um ka la rah lang ïa ki shyiap, ki maw bad ki jaboh kaba la pynsahkut pat ïa ka nala kaba don ha syndah ïing jong u kat haduh ba ka um ka la rung sha phyllaw bad ruh sha kamra sah ki nongshong wai.
U la ïathuh ba ki la dep ujor la bunsien sha u trai jong ka Tripura Castle hynrei u khlem leh eiei.
Ha kane ka sngi la ïoh ruh ban ïakren ïa ki nongshong wai bad kiba sah marjan. U la ong lada pra ka ïing lah ban shna biang hynrei lada jia ba ngat ka jingsngewsih ïa ki briew mano ban bahkhlieh.
