Nongstoiñ,Naitung 18
Ka jingsuki ban pyntrei ïa ka surok Nongstoiñ – Maweit kaba 12 km na Mawdom sha Maweit ka la ktah ïa ka ïaid ka ïeng jong ki paidbah khamtam ha ka pang ka shitom bad ha ka kit ka bha .
Ïa kane la pyntikna ruh da ki ar tylli ki kynhun seng ba kynthup ïa ka Hynniewtrep Youth Council bad ka Federation of Khasi Jaintia & Garo People Mawiet Circle, ha kaba kine ki kynhun seng hadien ka jingud jingnam jong ki paidbah ha ka sngi thohdieng jong ka taiew ki la leit ban buh ïa ki jingthoh sha ka tnad PWD Nongstoiñ ban kyntu ba kan shim khia bad leh ei ei halor kane.
U Samla Shemphang Tyrsa President ka HYC Maweit Circle ha ka jingdonlang kiwei pat ki para nongkitkam u la ong ba ka seng halor katei ka surok, ha ka sngi thohdieng jong ka taiew ki la ïoh ban leit buh jingthoh hapoh ophis PWD Nongstoiñ hadien ka jingïoh ïa ka jingujor halor ka jing suki ban pyntrei ïa katei ka surok .
Shuh shuh u la ong ruh ba nalor ka jingsuki ban pyntrei ïa katei ka surok, na ka liang ka HYC ka la ïoh ruh ban ïakren halor ka jingsniew jong katei ka bynta ba dang sah jong ka surok ha kaba la ong ba ka la wanrah jingeh ïa ki paidbah nong leit nong wan jong katei ka dong bad ka thaiñ khamtam ha ka por ba don ba pang ba shitom.
Na kaliang u Samla Anthony Umiong president ka Seng Federation of Khasi Jaiñtia and Garo People (FKJGP) Maweit Circle pat u la ong ba hadien ka jingleit jurip, ha kaba ïadei bad katei ka bynta na ka liang jong ka seng ka leit ban ïakynduh ïa u Executive Engineer ka tnad PWD ban ujor halor ka jingsuki u contractor ban pyntrei ïa katei ka surok ba dang sah teng ka ban poi shaduh Maweit.
U samla Anthony Umïong u la ong ruh ba ha ka jingshisha ïa katei ka surok la mang ban pyndep hapoh ka 21 tarik u Nailur 2025 hynrei ka jingtrei ka dang long tang kumba 40 percent eiei bad kane ka la ktah ruh ïa ka ïaid ka ïeng bad ka leit ka wan jong ki paidbah.
Shuh shuh u la ong ruh ba na ka liang jong u Engineer u la kular ha khmat ki dkhot jong ka seng ba un sa shimkhia ïa katei ka kam bad ha ka taïew ba nyngkong jong u Nailar un sa khot ia u contractor ban pynlong ïa ka jingleit jurip lang ïa katei ka surok.
