Brazil, Naitung:
U President ka Brazil, u Luiz Inacio Lula da Silca, ha ka Sngi Palei u la ther pyrshah ia ka jingbuh khajna ba 50% jong ka United States ha ka khaïi-pateng bad katei ka ri.
Ki jingkren jong u Lula ki long kiba hadien duh ha ka jingïakren kaba jur bha hapdeng ki nongïalam, ha kaba u President jong ka US, u la pynmih khamtam ïa ki jingthombor ba shyrkhei ïa ka sorkar ha Brazil.
U Trump, u la pynbna ha ka 9 tarik u Naitung ïa ka jingthmu jong u ban buh ïa ki khajna, kiba jur bha ïa ka Brazil kum ka jingpynshitom na ka bynta kaei kaba u la khot ‘ka jingpynhiar kput’ pyrshah ïa u President barim katei ka ri, u Jair Bolsonaro.
Ka United States ka la ong ruh ba ka dang tohkit ïa ka “jingleh khaïi bym hok” jong ka Brazil bad ka Brazil ka la ong ba ka long ba la kloi ban iakren pynbeit bad ka US haba iadei bad kane.
Ka jingbuh dor ïa baroh ki mar na Brazil kan sdang naduh ka 1 tarik u Nailar lada ka Brazil bad ka United States kim poi sha ka jingïasngewthuh jingmut.
Ha ka jingkren jong u nongïalam ka liang pyrshah ka Brazil, u Lula, u la kynthoh ïa ki riew saiñpyrthei jong ka Brazil, kiba kyrshan ïa ki polisi jong u Trump, kum ki “nongshetkylla ïa ka ri bad ka jaitbynriew.”
U la ong ba un bteng ban “bet ia ka jingiadei kaba bha ha ka khaii pateng bad ka jingiadei para briew” hynrei u la maham: “Ka Brazil ka don tang uwei u trai: kita ki long hi ki briew jong ka Brazil.”
U Bolsonaro u dang mad ïa ka jingbishar halor ki jingkynnoh ba u la thmu ban pynkhihwin hadien ba u la shah rem ha ka ilekshon 2022 ha u Lula. Lada lap ba u donkti, u lah ban shah set phatok haduh 40 snem.
Ha katei hi ka sngi, U Trump, u la pynmih ïa ka shithi kaba la thoh sha u Bolsonaro, ha ka Truth Social platform jong u, ha kaba u la ban jur ba ka sorkar jong u Lula, kan “kylla ïa ka lynti” bad ban “sangeh noh ban thombor” ïa u paralok saiñpyrthei jong u.
