Shillong, Naitung 20
U heprit Graham Jones Kharnarbi ba dang 13 snem karta u la wanrah biang ïa ka nam bad ka burom ïa ka ïing ka sem bad ruh ïa ka Jylla hi baroh kawei, ha kaba u la pynrem ïa uwei u rangïalehkai na Chattisgarh ha ka National Arm Wrestling Championship 2025 kaba la long ha Kerala.
U Graham Jones u dei u khun jong ka Kong Suzie Kharnarbi bad u Bah Terence Lyngshkor kiba shong basah ha Jaïaw Laitdom, Shillong.
Ha katei ka rynsan ïakhun kti jong kiba don jingduna ha ki dkhot met, utei u heprit u la wanrah nam ïa ka Jylla lyngba ar tylli ki takma ksiar, ba kynthup ha ka jingïakhun da ka kti kamon bad kti kadiang kaba la long ha ka 29 tarik u Jylliew 2025.
Haba ïakren bad u nongthoh khubor, u Graham Jones u la pynpaw ka jingainguh ïa U Blei ba najrong uba la ïalam lynti ïa u naduh kaba sdang bad haduh kane ka khyllipmet ba u la ïoh biang ïa ka nam jop ha kane ka jingïakhun Kti.
U la ïathuh ruh ba kane ka dei ka sien ba ar kaba u la rah ïa ka nam bad burom ha ka jingïakhun kti kaba dei ka National Level nalor kiwei pat ki nam jop ha ki jingïakop kiba la long hapoh ka Jylla.
“Ngam ju don ka jingtieng ïano ïano ruh ban ïakhun watla ki dei ki briew ba la heh bad la rangbah, hynrei nga don beit ka mynsiem ban ïakhun bad ïoh ka jingjop bad ban wanran nam bad burom ïa ka Jylla.”
Na ka liang u kpa jong utei u heprit, Bah T. Lyngshkor u la pynpaw ka jingsngewkmen haduh katta katta hadien ba u khun jong u, u la wanrah ïa ka nam ka burom ïa ka ïing ka sem bad ïa ka Jylla.
La ïoh ruh ka jingkren na u President ka Meghalaya Arm Wrestling u Bah Jonestar Kharbuli, da kaba kyntu ïa ki khun samla ba kin shim kane ka lad ban ïashim bynta ha ka kam ïalehkai la ka long ha kino-kino ki jingïalehkai bapher bapher.
Halor katei ka jingwanrah nam bad burom ïa ka Jylla, u MLA ka North Shillong Konstitwensi u Bah Adelbert Nongrum u la leit ban pynkup burom ïa u Graham Jones Kharnarbi da ka song pisa T. 25 hajar tyngka lyngba ka Intensive Sports And Youth Development Programme (ISYDP) na ka bynta ban ai ka jingkitbok ïa u khnang ba un dang ïai trei shitom nangne shakhmat bad ban ïai bteng ha ki kam ïalehkai jong u.
Ha kane ka sngi la ïadonlang ki bahaïing bahasem nalor ki dkhot ka Meghalaya Arm Wrestling Associa-tion bad kiwei.
