Shillong, Naitung 20
Haba kren halor ka rai jong ka Sorkar ban pynkynriah noh ïa ki nongdie madan ha ka thaiñ Khyndailad, u nongïalam ka BJP bad Myntri Sorkar, Bah A.L. Hek ha ka Sngi Ba-ar jong ka taïew ba la lah, u la ban jur ba “baroh ki don ïa ka hok ban im bad ban kamai ïa ka lad kamai kaba don burom.”
“Baroh ki don ïa ka hok ban im. Ki hap ban tip ruh ïa ka kyrdan,” ong u Bah Hek haba kren sha ki nongthoh khubor.
Haba kyntait ban kren shuh halor katei ka mat, u Myntri u la ong, “Mynta, katei ka kam ka dang don ha ïingbishar. Ngan ym lah ban ïathuh eiei ïa phi hynrei baroh ki don ïa ka hok ban im.”
“Ai ba ka ïingbishar kan shim ïa ka rai bad hadien kata ngin sa ïakren,” u la pynpaw.
Haba kylli hato ka rukom treikam ba la shim da ma u kum u MLA ka Pynthorumkhrah ban pynbeit ïa ka jingeh ki nongdie madan ha Golflink yn bud kumjuh da ka Sorkar ha ka thaiñ Khyndailad, u Bah Hek u la ong ba ha ryngkat ka Dorbar Shnong, ki la seisoh ha ka ban pynkynriah ïa ki nongdie madan ha Golflink sha ka jaka die jingdie (Mall) kaba khlem jingsiew, da kaba pynbiang sha ki ïa ka jaka kaba biang ban ïaid shakhmat bad ki lad kamai jong ki.
Katkum ka jingong jong u, ka Golflink ka dei kawei na ki shnong baitynnad bha ha Shillong namar ka jingdon jong ka Madan tied ‘Golf’ ne ka ‘Golf Course’.
Kane ka sienjam ka la pynlong ïa u Bah Hek ban long u nongmhikhmat ba nyngkong eh ha ka Jylla ban tei ïa ka ïew na bynta ki nongdie madan ha konstitwensi jong u.
“Baroh kine ki snem, naduh ba nga dang pule ha skul Primary, nga la ïohi ba kine ki nongdie madan ki la ïaid shakhmat bad ki lad kamai jong ki ha ki surok jong ka thaiñ Golflink. Haba ngi la ïoh lad, ngi la tei ïa ka ïew jong ki nongdie madan. Lada ngam bakla, nga dei uba nyngkong eh napdeng ki ‘riew saiñ-pyrthei baroh uba la tei ïa ka ïew ki nongdie madan – ïa kaba la ai sha man la ki nongdie madan khlem kano-kano ka jingsiew. Ha kaba sdang, ki la don 28 ngut na ki. Ngi la pynkynriah ïa ki ym sha ka jaka kaba malu-mala, hynrei sha ka jaka die jingdie (Mall) ba khlem jingsiew,” la ong u Myntri.
La u sngewkmen ne em ïa ka rukom treikam ka Sorkar ban shimkhia ïa ka jingeh ki nongdie madan, u Bah Hek ha kawei ka liang, u la ong, “Ngam ong ba ki (ka sienjam ka Sorkar) la bakla hynrei ban ai la kumno-kumno ka lad kamai kaba don burom sha baroh ki nongdie madan hapoh ka thaiñ Municipal jong ka Shillong.”
U Bah Hek u la kren ruh halor ki jingeh ba ïadei bad ki jingshai bording ha surok ha ka thaiñ Golflink, da kaba pynpaw ba la buh ïa saw tylli ki ‘Mast’ kiba jrong, bad la pyrshang ban pyntikna ba ka jaka baroh kawei kan long kaba shai. Hynrei u la kdew ba ki don katto-katne ki jingeh kiba dang hap ban pynbeit.
Haba ïadei bad ka jingpynslem ban pyndep ïa ka projek pynitynnad ha Polo, u Bah Hek u la ong ba ka projek ka dang ïaid shakhmat bad ba ki nongtrei ki dang trei minot ha katei ka thaiñ.
