Buh jingma na ka jingjur ki kam khaïi drok ha Northeast

Kane ka jingkren jong u ka long kum ka jubab halor ka jingjia kurup drok kaba la jia dang shen ha Mizoram.

Imphal, Naitung:

U Myntri Rangbah barim ka Manipur, u N Biren Singh, u la pynpaw ka jingsyier halor ka jingkiew stet jong ka jingkhaïi drok, kaba treikam ha kylleng ka thaiñ Shatei-Mihngi, da kaba ong ba ka dei ka jingma kaba khraw ïa ka jingshngaiñ jong ka ri bad ïa ka bha ka miat jong ki samla.

Kane ka jingkren jong u ka long kum ka jubab halor ka jingjia kurup drok kaba la jia dang shen ha Mizoram.

U Singh u la ïaroh ïa ka Assam Rifles bad ka Narcotics Control Bureau (NCB) halor ka jingtreilang jong ki ha Mizoram, kaba la pynlong ïa ka jingïoh kurup ïa u droks uba shongdor haduh T.36.79 klur.

“Nga ai khublei shibun ïa ki Assam Rifles bad ka NCB na ka bynta ka jingïatreilang jong ki… Kum kane ka jingleh kaba kut jingmut ka dei hok ban ïoh ïa ka jingithuh bad ka jingkyrshan kaba bteng,” la buh jingthoh u Singh ha ka rynsan X.

Haba pynpaw ïa ka jingheh bad jingma jong ka jingkhaïi drok, u Singh u la maham, “Kane ka kynhun khaïi drok kaba heh bha kaba treikam lyngba ka thaiñ Shatei-Mihngi ka long ka jingma kaba khraw ïa ka lawei jong ka ri jong ngi.”

U la pynkynmaw ïa ka jingïakhih kaba jur jong ka sorkar jong u pyrshah ïa ka jingrep syntiew Poppy bad ka jingkhaïi drok ha Manipur, da kaba ban jur ba kum kine ki jingpyrshang ki dei ban pynjur ha kylleng ka thaiñ.

U Singh, u la kyntu ruh ïa ki bor synshar, ba kin pynjur ïa ka jingpyntreikam jong ki ha Manipur, da kaba pynjot ïa ki lyngkha rep Poppy, kiba u ithuh kum ka tynrai jong ka jingkhaïi beaiñ. “Tang ka jingïakhih kaba ïatylli, kaba khlem sangeh ka lah ban ïada ïa ka thaiñ jong ngi bad ki samla jong ngi na ka jingshah teh mraw jong ki kam pyntriem lyngba u drok,” u la ong.

Katkum ka kyrwoh, ha ka 17 tarik Jylliew, ki shipai Assam Rifles bad ka NCB, ki la ïatreilang bad ki la kurup 642 grams u drok Heroin bad 10 kg ki kuli Methamphetamine na Zokhawthar ha Mizoram, ha kaba ka dor jong ki ka la kot sha ka T.36.79 klur tyngka.

Ka kynhun shipai ka la pynpaw biang ïa ka jingkular jong ka ban bteng ïa kum kine ki kam ban tehlakam ïa ka jingma.