Shillong, Naitung 20
Ka Pomlakrai SC bad ka Sanmer SC ki la ïasam mar shi point ha ka Group -A jong ka lympung ïalehkai SRGT 3rd Divi-sion Football League 2025 ba la pynïaid da ka Shillong Sports Association hadien ba kim shym la lah ban thep kol haduh kaba kut ka jingïalehkai ha ka Sngi Saitjaiñ ha SSA Stadium, Polo.
Lyngba kane ka jing-ïakhaid, ka Sanmer bad ka Pomlakrai ki la kamai mar 2 point na ar sien ïakhun, katba ka Lawmali SC ka danglamkhmat ryngkat bad 4 point.
Ki jingïalehkai ha ka Lah Sngi U Blei kin long hapdeng ka Rynjah pyrshah ïa ka Umrynjah (10:30 mynstep), kumjuh ka Imson ïa ka Lumparing (1:30 mynsngi) bad ka Iaitylli ïa ka Gorkha Association (4 baje nohphai sngi).
